მიშა ვოლდემორტი და ხალხთმოყვარეობის აპოთეოზი, ანუ გამოპავლეების ცრუმოსურნეები


„დიახ, ჩვენ ჯადოქრები ვართ და კიდევ ბევრ სასწაულს ელოდეთ!“ – ექიდნურად გაიღიმა ლორდმა ვოლდემორტმა და კიბეებზე გაუჩინარდა. გაიჩინარდა, რათა დუბაიდან და სინგაპურის ფორუმებიდან მოგვევლინოს და ფურცლებზე დაბეჭდილი რეიტინგების ფრიალით მოგვაჯადოოს, გრძნეულმა…

მისი გაოპოზიციონერებული გუნდი კი მათ მიერ 300 მილიონად დაუმთავრებელ ქაჯთა გამჭვირვალე სასახლეში გამაგრდა. იმ ერთადერთ დარბაზში, სადაც ჯერ წვიმა არ ჩამოდის და ვირთხებიც არ დარბიან. და მედგრად იშიშვლა ხმალი სამართლის და ჩაგრულთა დასაცავად:

–         როდის მოუმატებს მთავრობა ხელფასებს?

–         როდის მოხდება პენსიების მომატება?

–         როდის გაიაფდება გაზი, დენი და წყალი?

–         როდის გაიაფდება საბანკო კრედიტის განაკვეთი?

–         როდის გაიხსნება რუსეთის ბაზარი ქართული პროდუქტებისათვის?

–         როდის   დაუკანონდებათ ლტოლვილებს საცხოვრებელი ფართები?

„როდის?“ „რამდენი?“ „როგორ?“ – ისმოდა რისხვიანი შეკითხვები უმცირესობად ქცეული ახალხანს უმრავლესობისაგან.

მათი შეკითხვები, მათი იერსახე, მათი პათოსი სავსე იყო შემართებით – ქართველი ხალხის, ჩაგრულების, ლტოლვილების, გაჭირვებულების, უილაჯოების, დედების, ბავშვების, ავადმყოფების, ბიზნესმენების, უმუშევრების – ყველას სახელით და ყველას ინტერესების დასაცავად ბრდღვინავდა და თვალებიდან რისხვას აკვესებდა ნაცმოძრაობა!

ისინი არ მისცემენ უფლებას!.. ისინი ყოველთვის დაიცავენ!.. ისინი არ დაუშვებენ ქართველი ხალხის ფუნდამენტალური ინტერესების შელახვას!..

ისინი არ დაუშვებენ ზეწოლას!.. ისინი მიმართავენ მთელ მსოფლიოს იმაზე, რა საშინელებებს აპირებს „ქართული ოცნება“! როგორ აპირებს, რომ პარლამენტში შექმნას კონსტიტუციური უმრავლესობა! ეს ხომ დაუშვებელია?!

–         „ქართველი ხალხის სახელით!“ გამოდიოდნენ გოკა და ბოცო, ჩიორა და კაკო, გოგა და გოგი…

იყო ერთი ჟრიამული, რისხვათცვენა და ვოქსპოპულისტობა…

წესით და რიგით, ქართველი ხალხი ტაშით უნდა დახვედროდა პარლამენტის შენობასთან მათი ბედნიერებისათვის დამაშვრალ რაინდებს… წესით და რიგით დღესვე უნდა დაწყებულიყო ტელევიზიებში აღშფოთებულ ტელემაყურებელთა და ფეისბუქში გადარეულ ინტერნეტმომხმარებელთა დარაზმვა გოგი ოჩიაურის, გოკა გაბაშვილის, ნუგზარ წიკლაურის და გოგა ხაჩიძის ირგვლივ! უნდა მომხდარიყო შეშფოთებული აქტივისტების მიერ ფეისბუქზე ჯგუფის რეგისტრაცია ლოზუნგით – „მოვითხოვთ ბიძინა ივანიშვილის მთავრობის გადაყენებას!“ მერე რა, რომ ივანიშვილის მთავრობა ჯერ არც დამტკიცებულა, მთავარია, რომ გული გულობდეს – რაც მალე მოვითხოვთ, მით უკეთესი!

მეტი კონკრეტიკაა საჭირო! „ვადები, ვადები, ვადები – ჩქარა!“ „მოვითხოვთ, ხალხის სახელით!..“ „სადაა დაპირებული ინვესტიციები?“ „საიდან ეს არარეალური დაპირებები!“„ერთი წამით არ მოვასვენებთ! ჩვენ გვეჩქარება!…“ და ბოლოს საერთოდ ფანტასმაგორიული – „როგორ თუ წელიწადნახევარში წახვალთ? სად წახვალთ?!“

ნაცმოძრაობა არც დაუშვებს, და არც გაუშვებს!

ძალიან საინტერესო იყო ის, რომ ჩამოლაბორანტებული უმცირესობა რისხვით და მკვეთრი შეკითხვებით თავს დაატყდა სწორედ იმ კანდიდატს, ვინც მათმა სათაყვანებელმა ვოლდემორტმა წარადგინა. სრულიად სამართლიანად დაწერა ფეისბუქზე ბ-ნმა ირაკლი შავიშვილმა – მარტო ამიტომ დასაფასებელია პირველი ოქტომბერიო! წარმოიდგინეთ, მთელი 9 წლის განმავლობაში, როდესმე და რამეში ნაცმოძრაობის დეპუტაციას გაუწევია წინააღმდეგობა თავისი ფიურერისათვის?

ა-რ-ა-ს-ო-დ-ე-ს!

დღეს კი მისი დასახელებული კანდიდატი დაიწუნეს და ისიც კი გაბედეს და თქვეს – ამ კაცს ხმას არ მივცემთო!

ბუნტია „კოსტა კონკორდიაზე“, მაჭკატ!

მაგრამ ვინ არიან ეს სამართლის და დამაშვრალთა დასაცავად ხმალამოღებულთა შეუპოვარი ჯგუფი?

ეს, შემთხვევით, ის ხალხი ხომ არაა, ვინც საქართველოში უსამართლობის და უზენობის პარპაში დაუშვა მთელი 9 წელი?

ეს ის ხალხი ხომ არაა, ვინც საქართველოში 35-ლარიანი უპატრონოდ დაგდებული ფიცრის მოპარვისთვის 65 წლის ლტოლვილს 1 წლით ციხეში უშვებდა, ხოლო თავად ათობით და ასობით მილიონის ხე-ტყეს იპრავდა, ქვეყნის სტრატეგიულ სიმდიდრეებს „უპრაგონოდ“ ჰყიდდა და 1 ლარად აჩუქებდა? ვინც საკუთარი ქონება მილიარდებამდეც კი გაზარდა?

ეს ის ხალხი ხომ არაა, ლტოლვილებს პოლიციის ძალით რტყმევით რომ ყრიდა მრავალწლიანი საცხოვრებელი ადგილებიდან და კუნგის ტიპის დახურული  ავტოფურგონებით საცხოვრებლად შეუფერებელ გეტოებსა და რეზერვაციებში ეზიდებოდა?

ეს ის ხალხი ხომ არაა, ვინც ყველა ბიზნესი გათელა და ქვეშ  მოიგდო, მონოპოლიები და კარტელური გარიგებები ნორმად აქცია, ვინც საბანკო კრედიტის განაკვეთი ევროპაში უმაღლეს დონეზე ასწია, ხოლო საცხოვრებელი მინიმუმის დონეს მუდამ ხელოვნურად ამცირებდა და აყალბებდა! ვინც ერთ დღეში ბიზნესის დაფუძნების გაპიარებით ნახევარ ღამეში ბიზნესის ახევის მათეული პრაქტიკა მიჩქმალა?

ეს ის ხალხი ხომ არ ლაპარაკობს ზეწოლებსა და გადაბირების მცდელობებზე (და აბსოლუტურად უსაფუძვლოდ და უარგუმენტოდ ლაპარაკობს!) ვინც პოლიტიკური პოლიციისა და ზონდერბრიგადების გამოყენებით ასობით და ათასობით ადამიანზე რომ ძალადობდა ხანგრძლივად? ვინც ხალხს პოლიტიკური ნიშნით აწინაურებდა საჯარო სამსახურებში და პოლიტიკური ნიშნით ათავისუფლებდა სამსახურიდან?

ეს ის ხალხი ხომ არ ახსენებს სიტყვა „სამართალს“, რომელთა მიერ სამართალი ყველა დონეზე შეგინებული და გაუპატიურებული იქნა?

ეს ის ხალხია – ახლა რომ „მერყევი ფსიქიკის“ ბრალდებებს უსაფუძვლოდ ისვრიან, – ვინც მართლაც და ფეთქებადი ფსიქიკის ლიდერს დითირამბებს უმღეროდა ცხრა წელი?

ეს ის ხალხია, ვინაც 2008 წლისთვის დაპირებული 100 დოლარიანი პენსია დღემდე არ შეასრულა, ახლა რომ წამდაუწუმ ჰკითხულობს – 220 ლარს როდის გახდის პენსიებს ივანიშვილიო?

ეს ის კაბინეტი ხომ არ არის, რომლის წევრები სადისტობას, ჯალათობას, კრიმინალებთან მეგობრობას და უზნეობას – დემოკრატიის შუქურვარსკვლავობას და კეკლუცხათუნობას რომ უთავსებდა?

დაბოლოს, ეს ის პოლიტიკური ძალა არ არის, რომელთა მინისტრები სამარცხვინოდ „მოტყდნენ“ ქვეყნიდან და ახლა ეპისტოლარულ-ფეისბუქურად გვეკონტაქტებიან და გვარწმუნებენ – არასოდეს არ მიგატოვებთოD:D:D? ეს ის ხალხი ხომ არაა, ვითომდა, პრეზიდენტთან შესახვედრად წასული, მძღოლს რომ მობილურს უტოვებდა მანქანაში და თავად აეროპორტიდან ფრანკფურტში ტყდებოდა ოჯახთან ერთად?  ეს ხომ ის ლიდერებია, რომლებიც გაიქცნენ, რადგან, სავარაუდოდ, ყველა საფუძველი არსებობს, რომ მრავალწლიანი ციხე ემუქრებათ, როგორც კრიმინალებს და მაფიის ბოსებს?

და ისე, ნამეტანი ხომ არ მომდის, რომ ამ ავაზაკთა ბანდას „ხალხს“ ვუძახი? უფრო უპრიანი არ იქნება ან – “ფლიდები”, ან – “ვერაგები”, ან -„ახვრები“, ან – „თუქსუსები“?.. აი აქ კი მჭირდება დახმარება, იმის გასარკვევად, ჩამოთვლილთაგან რომელი ტერმინი უფრო სწორია მათთან მიმართებაში.

ჩამოუმცირესობებული ნეობოლშევიკების ტაქტიკა სრულიად აშკარაა:

  1. რაც შეიძლება ადრე – ახალი მთავრობის მიერ ძალაუფლების აღებამდე (და განსაკუთრებით, სასამართლოებსა და პროკურატურაში ცვლილებების მოხდენამდე) – მოახდინონ საზოგადოებაში ნიჰილიზმის და ეჭვის დათესვა იმის თაობაზე, რამდენად მოახერხებს ივანიშვილის მთავრობა [წინა ხელისუფლების მიერ კატასტროფულად ჩასვრილი საქმეების გამოსწორებას და] სხვადასხვა სფეროებში ხალხისთვის გაუმჯობებსების რეალურად მოხდენას. ეს განსაკუთრებით ეჩქარებათ მანამ, სანამ უკვე ოფიციალურად გამოაშკარავდება მათ მიერ ხაზინის კატასტროფულ მდგომარეობაში დატოვება. უკვე არის ინფორმაცია, რომ ნაცვლად მერაბიშვილის მიერ გაცხადებული 2 მილიარდისა, ხაზინაში მხოლოდ 200 მილიონია!
  2. ყველანაირად მოახდინონ იმის იმიტაცია, რომ ჩაგრული პოლიტიკური ძალა არიან! რომ არიან დემოკრატიის მებაირახტრეები, რომელთაც გამარჯვებული უმრავლესობა საშინლად და უკანონოდ ჩაგრავს!
  3. როდესაც უახლოეს ხანებში დაიწყება იმის სრულმასშტაბიანი გამოაშკარავება, რა დონის და როგორი მასშტაბური კრიმინალი აქვს ჩადენილი ნაციონალურ მოძრაობას, როდესაც სასამართლოებში არა ათობით, არამედ – ათასობით საჩივარი შევა, როცა ყველასთვის (მათ შორის – დასავლელი ლიდერებისთვისაც) ცხადი გახდება, როგორი ძალადობის ხარჯზე არსებობდა ეს ვარდისფერი გულაგი, ეს ყველაფერი შერაცხონ მათ პოლიტიკურ დევნად და დასავლური დემოკრატიებისაგან და ანგაჟირებული მხარდამჭერებისაგან (ვილფრედ მარტენსი, კარლ ბილდტი, დონალდ ტრამპი და სხვები) მოითხოვონ მფარველობა!
  4. დარაზმონ ყველა ის ძალა, რომელთა მოთხოვნილებებს თავად მრავალ წელს აბსოლუტურ იგნორირებას უკეთებდნენ, მასიური საბოტაჟის და გამოსვლების ორგანიზებისათვის. ამის განსაკუთრებით თვალნათელი მაგალითებია დევნილთა მიერ შენობებში შეჭრის, მიტაცების და უკანონოდ დასაკუთრების კატასტროფულად გახშირებული ფაქტები. იქამდე მივიდა საქმე, რომ დევნილები უკვე იმ ორგანიზაციების შენობებსაც იტაცებენ, რომლებიც ნორმალურად ფუნქციონირებენ, ან რომლებიც სხვა დევნილებისთვის არის დაკანონებული. ყველაზე  საინტერესო კი ისაა, რომ ამ მიმტაცებელთა შორის არიან აბსოლუტურად გაურკვეველი „ბექგრაუნდის“ მქონე პირები, რომლებიც არ არიან ლტოლვილები ანდა არც უარყოფენ, რომ მათ უკვე აქვთ დაკანონებული საცხოვრებელი, მაგრამ „სურთ საცხოვრებელი პირობების გაუმჯობესება და გაფართოება“ !!! აშკარა, რომ ეს არის კოორდინირებული ქმედება, რომლის უკან მაცმოძრაობის ინტერესები აშკარად იკვეთება – ეს არის ქვეყანაში უკანონო მდგომარეობის და ანარქიის შექმნა, რომ მოსახლეობას ნაცმოძრაობის მიერ გარანტირებული „წესრიგი“ მოენატროს!
  5. მოახერხონ ადგილობრივ თვითმმართველობებში და გამგეობებში, მერების და გუბერნატორებისათვის პრეზიდენტის მიერ სასწრაფოდ გადასროლილი სახსრების და ქონების ხარჯზე რეგიონალური „ვანდეის“ ჩამოყალიბება და საბოტაჟის და პროპაგანდის მეშვეობით საფუძვლის მომზადება 2013 წლის აპრილის თვეში პრეზიდენტის მიერ პარლამენტის დაშლისა და რიგგარეშე საპარლამენტო არჩევნებში რევანშისთვის.

„ნაცმოძრაობის მთავარი შეცდომა იყო, რომ ნაცმოძრაობა ზედმეტად დემოკრატიული იყო!“ – იძახის ზომბირებული ექსპერტი გია ნოდია. თურმე, „დემაგოგია, ზოგადად, პოლიტიკოსთა წესია“ და „ არ ღირს შევაჯიბროთ, ვისი დემაგოგია უფრო დემაგოგიურია“. „ზედმეტად დემოკრატიულად“ მიიჩნევს იგი იმას, რაც ხდებოდა სასამართლოებში, პროკურატურაში, ციხეებში, სკოლებში… როცა ეკითხებიან კონკრეტულ – უკვე გამოვლენილ – დანაშაულებებზე, მხრებს იჩეჩავს, რომ არ იცის… ეჩქარება ბატონ გიას დემოგოგიური გამოსვლების ციკლის ჩამთავრება. ზუსტად ისე, როგორც ეჩქარებათ ბარამიძეს და გაბაშვილს, წიკლაურს და ბობოხიძეს, კუბლაშვილებს (სასამართლოს რეიტინგით მოტრაბახე ბ-ნ კონსტანტინეს!) და ოჩიაურებს (მსოფლიო ბანკის რეიტინგებით მოტრაბახე ბ-ნ გოგის)… როცა ასობით და ათასობით სასამართლო პროცესი დაიწყება და ყველასთვის აშკარა გახდება, თურმე რა საშინელება იფარებოდა ვარდისფერი ფასადის მიღმა, მერე ხომ უკვე ძალიან გაძნელდება „მე რა ვიცოდი?“-ს ტიპის „ნაივური“ მხრების აჩეჩვა?! ქართული ავტობანები, იუსტიციის სასახლეები და ნეონის ნათურები ხომ მანამდეა თვალისმომჭრელი, სანამ ციხეებში არსებულ ძალადობას გაეცნობი?!

P.S. ახლა კი, წარმოიდგინეთ ასეთი მოდელირებული სურათი –

1949 წლის გერმანია.

კონრად ადენაუერის მთავრობის დამტკიცების წინ ბუნდესტაგის ტრიბუნაზე რიგრიგობით ადიან იოზეფ გებელსი, ჰაინრიხ ჰიმლერი, ჰერმან ჰერინგი, იოაკიმ ფონ რიბენტროპი, ჰაინრიხ მიულერი… თავად ფიურერიც (როგორც ოპოზიციის ლიდერი!) და ფოლადისებური ხმით ჩამჭრელ კითხვებს უსვამენ კანცლერობის კანდიდატს:

–         რას გააკეთებთ გერმანელი ხალხის ბედნიერებისათვის?

–         როდის დაიბრუნებთ პრუსიას და ელზასს?

–         როდის აღადგენთ დანგრეულ მრეწველობას?

–         როდისთვის მოახერხებთ გერმანული საფინანსო სისტემის სტაბილიზაციას?

–         როდის გახდება მინიმალური პენსია 1000 მარკა?

–         როდის დატოვებენ უცხო ქვეყნების ჯარები გერმანულ მიწებს?

ხოლო სესიის შემდეგ გებელსი ამაყად გაიძახის ჟურნალისტების მიკროფონების წინ:

– ჩვენ არ დავუშვებთ გერმანელი ხალხის მოტყუებას! ადენაუერს არ გაუვა პროპაგანდისტული ხრიკები! ჩვენ სიმართლეს მოვითხოვთ!

ჰიმლერიც ასევე ამაყად იძლევა ინტერვიუს:

– გერმანელი ხალხი ყოველთვის იყო ტოლერანტულობის ნიმუში და ჩვენ არ მივცემთ უფლებას ახალ უმრავლესობას, ფეხქვეშ გათელოს პოლონელი თუ რუსი ტყვეების უფლებები, მოვითხოვთ მათთვის სამართლიან სამუშაო კონტრაქტებს, თანაბარ ანაზღაურებას და უმუშევრობის დახმარებას!

ხოლო გესტაპოს შეფი მიულერი სულაც ებრაელების და სექსუალური უმცირესობების უფლებების დაცვის აუცილებლობაზე  წარმოთქვამს მგზნებარე სიტყვას!

თვალისდაუხამხამებლად!

რამეს ხომ არ გაგონებთ ეს „მოდელირებული წარსული“?

იმის კვალობაზე, როგორ სულ უფრო გულისშემძვრელი ფაქტები ხდება ნათელი იმ მასობრივ ძალადობაზე, რაც დემოკრატიის შუქურად წოდებულმა ძალამ მასობრივი ტერორის ლაბორატორიად ქცეულ საქართველოში დანერგა, თითქმის დარწმუნებული ვარ, რომ საქართველოსთვის ნიურნბერგის მსგავსი პროცესი აუცილებელია. და სამართლიანობის აღდგენის ეს პროცესი თავად საქართველომ უნდა ჩაატაროს. ვფიქრობ, დიდი შანსი არსებობს, რომ ამან ისევე დაუდოს საფუძველი საქართველოს სახელმწიფოს, სამართლიანობის, საზოგადოების და ეკონომიკის აღორძინებას, როგორც ეს 50-იანი წლების გერმანიაში მოხდა.

WITHOUT  JUSTICE,  THERE  CAN  BE  NO  PEACE!

Advertisements

განცხადება ბილწსიტყვაობით დაკავებული მანქურთების გასაგონად


ძვირფასო მიშმადიდებლებო!

გარწმუნებთ, რომ არ ვარ არც ვასილ მაღლაფერიძე, არც ლაშა ნაცვლიშვილი, არც ლევან ბერძენიშვილი, არც ირაკლი კაკაბაძე, არც დავით ზურაბიშვილი და არც ვინმე სხვა ცნობილი ადამიანი! არც ვასიკო ოდიშვილი ვარ! შალვა ნათელაშვილი ხომ – არა და არა…

ტყუილად ნუ ძაბავთ ტვინის უჯრედებს ჩემსა და რომელიმე ცნობილ ოპოზიციონერს შორის რაიმე მსგავსების აღმოსაჩენად!

ნუ ბილწსიტყვაობთ და შეურაცხყოფას ნუ აყენებთ ამ და სხვა ადამიანებს მხოლოდ იმიტომ, რომ როგორც ექს-“მოქალაქე” მიშა II მაჭავარიანი იტყოდა, თქვენი გაფუჭებული ფანტაზიით თქვენი მონური სულისკვეთება სახალხოდ დაამტკიცოთ…

მიშა I-ს მიხედეთ, მიშა I-ს! უკვე ისე “გამაგრდა”, რომ ბალზამიც არ ჭირდება!

იმაზე იდარდეთ, რომ რომ თქვენს ფარას პოლიტიკური ყოჩი აღარ ჰყავს – ცარიელ ფიტულს მიჰყვებით “ბეე-ბეე”-ს ბღავილით…


მედიის პირმშო და დაუძინებელი მტერი – გამოუცხადებელი ცივი ომის და ცხელი რეიდერული დაპყრობების ქრონიკები


ვარდების რევოლუცია იყო მედიის პირმშო!

და ბედის ირონიაა, რომ სწორედ მიხეილ სააკაშვილი და მისი ნაცმოძრაობა იქცნენ სამართლიანი მედიის ყველაზე დაუძინებელ მტრად! თანაც – ხელისუფლებაში მოსვლის პირველივე დღიდან!

ქართულ მედიაზე შეტევა სააკაშვილმა პრეზიდენტად არჩევისთანავე დაიწყო. უკვე 2004 წელს  ქართული საინფორმაციო სივრციდან გაუჩინარდა რამდენიმე გაზეთი და ტელეკომპანია – ტელეკომპანია ”იბერია”, გაზეთი ”ახალი ეპოქა”, ”დილის გაზეთი”, ”მთავარი გაზეთი”, ჟურნალი ”ომეგა”, საინფორმაციო სააგენტო ”ინტერ-პრესი”; დაიხურა წამყვანი ანალიტიკური გადაცემები – ”ღამის კურიერი”, ”ღამის მზერა”, ”რა ხდება”, ”ტაიმაუტი”, ”ცაიტნოტი” და, განსაკუთრებით აღსანიშნავია – ”60 წუთი”,  შევარდნაძის დროს საოცრად მაღალი რეიტინგის მქონე ყოველკვირეული ჟურნალისტური გამოძიება, რომელსაც მაშინდელი ოფიციოზის რამდენიმე პირის კარიერა ემსხვერპლა. დაიწყო ეთერიდან ხელისუფლების ამა თუ იმ წარმომადგენლისთვის მიუღებელი სიუჟეტების მოხსნა. ჟურნალისტების დახარისხების პარალელურად დაიწყო ზოგიერთი მათგანის ხელის მოოქროვების, ხოლო სხვების – არშემჩნევის, განქიქების და მოკვეთის  პოლიტიკა.

2005 წელს მთავრობის მხრიდან განხორციელებული ზეწოლის შედეგად დაიხურა ტელეარხ ”მზის” საინფორმაციო გადაცემები – იმ მოტივით, რომ საჭირო იყო მკაცრად გასართობი არხი, და რომ მოსახლეობას არ უნდოდა ზედმეტი ინფორმაცია. პარლამენტარ კობა ბექაურის მიმართ თანხის გამოძალვის ბრალდებით დააკავეს პოპულარული ჟურნალისტი და სააკაშვილის პიარ-ქმედებების მენეჯერი, პოპულარული შოუ “დარდუბალას” ავტორი და ტელეკომპანია 202-ის დირექტორი შალვა რამიშვილი, ხოლო არხი, რომელიც სულ უფრო მეტად ხდებოდა მთავრობის მოქმედებების კრიტიკოსი, ასევე დაიხურა.

აი, რა განცხადება გააკეთეს ქართველმა ჟურნალისტებმა 2005 წლის 8 ივლისს რუსთაველზე მშვიდობიანი აქციის ხმაურიანი დაშლის და ზოგიერთი ჟურნალისტის მიმართ განხორციელებული ფიზიკური ზემოქმედების პასუხად:

”ჩვენ, საქართველოში მოქმედი ჟურნალისტები, ღიად ვაცხადებთ, რომ ხელისუფლება ცდილობს, ჩაერიოს და გააკონტროლოს ჩვენი საქმიანობა. აგვიკრძალოს მისთვის არასასურველი ინფორმაციის სატელევიზიო ეთერსა თუ საგაზეთო ფურცლებზე მოხვედრა, პრობლემები შეგვიქმნას ინფორმაციის მოპოვებასა და შემდგომ მის გავრცელებაში. განახორციელოს სადამსჯელო ღონისძიებები იმ მედია-საშუალებათა წინააღმდეგ, რომელთა ინფორმაციები, ანალიტიკური გადაცემები თუ თოქ-შოუებიც არ მოეწონება. დღევანდელ საქართველოში მედია-საშუალებებზე ზეწოლა და მათ საქმიანობაში უხეში ჩარევის მცდელობა მზარდი დემოკრატიული სახელმწიფოსთვის განვითარების საუკეთესო ინდიკატორად ნამდვილად არ გამოდგება. ამიტომაც მოვუწოდებთ ხელისუფლებას, თავი შეიკავონ დამოუკიდებელი მედიის საქმიანობაში ჩარევისა და იმ უპასუხისმგებლო განცხადებებისგან, რომელსაც მმართველი პარტიის ხელმძღვანელები ჩვენი მისამართით აკეთებენ.” 

2005 წლის 1 დეკემბერს, ადგილობრივი ტელეკომპანია „რიონის“ პირდაპირ ეთერში, აკაკი ბობოხიძემ, რომელიც მაშინ იმერეთში პრეზიდენტის რწმუნებული იყო, სცემა ჟურნალისტი ირაკლი იმნაიშვილი, რომელსაც ცხვირი გაუტყდა და ტვინის შერყევა მიიღო. იმის მაგიერ, რომ ბობოხიძე პოლიტიკური საქმიანობისათვის ჩამოეშორებინა, პრეზიდენტმა თავისი სურვილით თანამდებობიდან გადამდგარი გუბერნატორი რამდენიმე კვირაში კიდევ უფრო დააწინაურა – საქართველოს ეროვნული გვარდიის სარდლად! ხოლო ნიჭიერი ახალგაზრდა ჟურნალისტი, სავარაუდოდ – მასზე განხორციელებული ზეწოლის შედეგად – იძულებული გახდა საქართველო დაეტოვებინა და ამჟამად ინგლისში ცხოვრობს.

2005 წლის დეკემბერშივე გაზეთებში თავისი თავის მიმართ მზარდი კრიტიკით გაღიზიანებულმა საქართველოს პრეზიდენტმა განაცხადა, რომ ის ქართულ პრესას თითქმის არ კითხულობს. მანვე გასცა არაოფიციალური ზეპირი ბრძანება, რომლითაც სამთავრობო ორგანიზაციებს აეკრძალათ (!) ქართული ჟურნალ-გაზეთების გამოსაწერად ხარჯების გაწევა. ამ სერიოზული ფინანსური წნეხის გავლენა 2006 წელს ძალიან მტკივნეულად იგრძნეს ქართულმა გაზეთებმა, რომელთა უმრავლესობის ტირაჟი  1000-3000-ით შემცირდა.

2006 წელს სატენდერო განცხადებების განთავსების უფლება მიიღო შევარდნაძის დროს ყველაზე მკვეთრად ოპოზიციურმა გაზეთმა „24 საათი“,  რომელიც 2004 წლიდან მკვეთრად პროსამთავრობო გახდა. ბოლო 3-4 წელია, აღნიშნული გაზეთის რეიტინგი უაღრესად დაბალია და მისი არსებობის ერთ-ერთი ან ერთადერთი სერიოზული წყარო სწორედ სატენდერო განცხადებებიდან შემოსული მსუყე დოტაციაა.

2006 წ. 7 ივლისს -ტელეკომპანია ”რუსთავი2”-ის ყველაზე რეიტინგული გადაცემის “თავისუფალი თემის” ავტორმა და წამყვანმა, და ამავდროულად საინფორმაციო სამსახურის უფროსმა ეკა ხოფერიამ პირდაპირ ეთერში ძალოვნების მიერ ახალგაზრდა ბანკირის სანდრო გირგვლიანის მოტაცების, სადისტურად წამების და მკვლელობის თემის განხილვისას განაცხადა, რომ მან ნაცმოძრაობის ერთ-ერთი ლიდერის – გიგა ბოკერიასაგან (დღეს – საქართველოს უშიშროების საბჭოს მდივანი) მიიღო ინსტრუქციები იმის შესახებ, რა უნდა ეთქვა და რა – არა. ჟურნალისტმა განაცხადა, რომ ხელისუფლებიდან წამოსულმა ასეთი ”რჩევებმა” უკვე სისტემატური ხასიათი მიიღო, რომ იგი არ აპირებს, დაემორჩილოს ზეწოლას და პროტესტის ნიშნად დატოვა ტელეკომპანია რუსთავი-2. არავითარი გამოძიება ამ ფაქტს არ მოჰყოლია.

სტუდია „მონიტორის“ (ავტორი – ნინო ზურიაშვილი) ძალიან მძაფრ და საინტერესო ფილმი ქართული  ტელევიზიების მძიმე ბედის შესახებ (http://www.ijp.ge/video_blank.php?vid=38)  დოკუმენტურად აჩვენებს, რომ 2003 წელს საქართველოში იყო 12 კერძო ტელევიზია, რომელთაგან 4 მთელ საქართველოზე მაუწყებლობდა და რომელთა ნახევარი მაინც ხელისუფლებისაგან დამოუკიდებლობის მაღალი ხარისხით გამოირჩეოდა. ვარდების რევოლუციის შემდეგ 4 წელიწადში აქედან 11-ს (“რუსთავი2”-ს, “იბერიას”, მე-9 არხს, “202”-ს, “ევრიკას”, … ფაქტიურად ყველას, გარდა ტვ „კავკასიიისა“) შეეცვალა მფლობელი, ან გააუუქმდა ლიცენზია! ევროკავშირის და „საერთაშორისო გამჭვირვალობა – საქართველოს“ მიერ დაფინანსებულმა კვლევებმა აჩვენეს, რომ ტელევიზიათა მფლობელობის საკითხი მჭიდროდაა გადაჯაჭვული  ამ ტელევიზიების სახელმწიფოს მხრიდან კონტროლის ასპექტთან, ასევე – მათდამი ნდობის ხარისხთან

http://www.epfound.ge/files/geo_media_research_report_ge.pdf   http://irdb.wordpress.com/2009/11/24/სატელევიზიო-სივრცე-საქარ/ http://www.humanrights.ge/index.php?a=article&id=3795〈=ge

ამჟამად საქართველოში მოქმედი 40-ზე მეტი სატელევიზიო არხის მფლობელი, მიუხედავად კანონის მხრიდან აკრძალვისა, ზოგ შემთხვევაში, იყვნენ ან არიან ხელისუფლების მოქმედი ან ახლო წარსულში აქტიური პირები, ან მათი ოჯახების წევრები, (კონკრეტულად – კავშირგაბმულობის მარეგულირებელი კომისიის დირექტორი ირაკლი ჩიქოვანი, ამავე კომისიის  წევრის სოფიო ბრიტანჩუკის მეუღლე ნოდარ ჭარხალაშვილი, პრეზიდენტის კანცელარიის უფროსი გიორგი არველაძე), მუნიციპალიტეტები (ახმეტის) ან მუნიციპალიტეტის წევრები. გამოვლენილია, რომ ხელისუფლებასთან დაახლოებული პირები და მათი ნათესავები/მეზობლები ხშირად გაურკვეველ ვითარებაში დაეუფლნენ ტელევიზიების მსხვილ ან საკონტროლო პაკეტებს. ერთი და იგივე საკმაოდ ბუნდოვანი წარმოშობის და ოფშორებში რეგისტრირებული კომპანია – Degson Limited  – ჰოლდინგ „საქართველოს ინდუსტრიული ჯგუფთან“ ერთად ფლობს ეროვნული რანგის ტელეკომპანიებს „რუსთავი-2“ და „მზე“.  მეორე მისტიკური ორგანიზაცია – Denial Union – ტელეკომპანია „საქართველოს“ (თავდაცვის სამინისტროსთან ასოცირებული არხის) 100%-ს და ტელეკომპანია „ევრიკის“ 51%-ს ფლობს. ტელეკომპანია „იმედის“ აქციების 100%–ის მფლობელია „Georgian media production group”.  ამ კომპანიების უმრავლესობა რეგისტრირებული ოფშორულ ზონებში და მიუხედავად სპეციალური საკანონმდებლო ცვლილებებისა, საქართველოს ხელისუფლება არ ჩქარობს მოახდინოს ეროვნულ სამაუწყებლო კომპანიებზე ასეთი ოფშორული მფლობელობის წესის პრაქტიკულად აკრძალვა და ტელეკომპანიების მფლობელთა შესახებ ინფორმაციების გასაჯაროება.

2004 წლიდან დაწყებული I სატელევიზიო არხის – ანუ საზოგადოებრივი არხის ხელმძღვანელობაში მოდიოდნენ მთავრობის მიერ დანიშნული – სულ უფრო ოდიოზური, სულ უფრო მეტად კონტროლირებადი პირები და საზოგადოებრივი არხიც სულ უფრო ხდებოდა სააკაშვილის სურვილების შემსრულებელი და ქართული საზოგადოების დეზინფორმაციის სერიოზული ინსტრუმენტი…

2006-07 წლები – ვანო მერაბიშვილმა და ნაცმოძრაობის სხვა დიდმოხელეებმა მოახერხეს მრავალი მედიასაშუალების დაქვემდებარება, რის შემდეგ ეს მედიარესურსები ან დაიხურა,  ან მყვირალა, არაეთიკურ და ნაკლებად ობიექტურ მედიასაშუალებებად იქცა, რომელთა საქმიანობის სტილი მარტივად შეიძლება ასე დახასიათდეს – „ვაკრიტიკოთ ხელისუფლება და ლაფში გავსვაროთ ოპოზიცია!“

2007 წლის 7 ნოემბერი – უკანასკნელი ეროვნული მასშტაბის დამოუკიდებელი ტელევიზია – „იმედი“განადგურებულ იქნა  სპეცნაზის შეჭრის და არნახული დარბევის შედეგად.

2008 წელი – იმედის ტელეარხი ღამით ზეწოლისა და სხვადასხვა მაქინაციებით გადაუფორმდა პატარკაციშვილის შორეულ ნათესავს, საქართველოს მთავრობასთან გარიგებაში მყოფ ჯოზეფ კეის, ხოლო შემდეგ – ვითომ არაბულ ”რაკიინ ჯორჯია ჰოლდინგს”, რომლის ”წარმომადგენელი”, ვინმე მარკ მონემი, ისე გაქრა პრეზენტაციის შემდეგ, რომ არავის არსად აღარ უნახავს. არაბული კომპანიის ”რაკ”-ის ხელმძღვანელმა 2009 წელს განაცხადა, რომ ტელევიზია ”იმედი” მათი აქტივი არასოდეს ყოფილა და რომ ის ”რაკიინ ჯორჯია ჰოლდინგი” მისთვის უცნობი კომპანია იყო! და ამით ირიბად დაადასტურა, რომ ”იმედი” სინამდვილეში საქართველოს ხელისუფლებას ეკუთვნოდა, შექმნა რა არაბული რაკიინის ვითომდა შვილობილი მსგავსი სახელის მქონე კომპანია, რომელიც რეალურად ხელისუფლების მიერ დაქირავებული პირები მართვადნენ. ამას ისიც ადასტურებდა,რომ 2008 წელს ტელეკომპანია იმედის სახელფასო ხარჯებს ქ. თბილისის მერია ფარავდა! 2011 წელს პატარკაციშვილის ოჯახმა სხვა აქტივების დათმობის სამაგიეროდ ოფიციალურად დაუთმო იმედი საქართველოს მთავრობას, რითაც ფაქტიურად დადასტურდა, რომ ჯოზეფ ქეიც და ”არაბებიც” სააკაშვილის ხელისუფლების შირმა იყო მხოლოდ.

2008 წლიდანვე დაიწყო სამივე ნაციონალურ მასშტაბის ტელეარხის – ”საზოგადოებრივი არხი”, ”რუსთავი2”, ”იმედი” – თანდათან სულ უფრო მზარდი სახელმწიფო ცენზურა. ნაციონალური მოძრაობის სხვადასხვა ლიდერები – გიგი უგულავა, ლევან რამიშვილი, გიგა ბოკერია, გოკა გაბაშვილი, გიორგი არველაძე – სხვადასხვა დროს ამ არხების პირადი ცენზორების როლს ასრულებდნენ.

2010 წ. – თბილისის მერიის გადაწყვეტილებით ჟურნალ-გაზეთებით და წიგნებით ქუჩაში ვაჭრობა – თუნდაც სტელაჟებიდან – გარე ვაჭრობის ნაირსახეობად ჩაითვალა და აიკრძალა. რამდენიმე ასეული ადამიანი თბილისში უმუშევარი დარჩა.

2010 წ. – სტელაჟებიდან მოვაჭრეების ლიკვიდაციის შემდეგ თბილისის მერის გიგი უგულავას განკარგულებით თბილისში რამდენიმე ასეული Press ჯიხური ჩაიდგა. ამ Press ჯიხურებში, რომელსაც ვითომ დუბაიური ფირმა, ხოლო სინამდვილეში – ლატარიის კომპანიის მაშინდელი მფლობელი, თავდაცვის ყოფილი მინისტრი დავით კეზერაშვილი აკონტროლებდა, მალე საქართველოს ლატარეის ბილეთების გაყიდვა დაიწყო და ისინი ჟურნალ-გაზეთების გაყიდვაზე უკვე ნაკლებ დამოკიდებულნი გახდნენ. დღეს ეს ჯიხურები ჟურნალ-გაზეთებსაც ჰყიდიან, მაგრამ ეს მათი შემოსავლების მინიმუმია და თუ მთავრობას (ვინც მათ საკუთარი ახლობლების ხელით მართავს) დასჭირდა, რომ პრესა, ან  რომელიმე კონკრეტული გაზეთი, არ გაიყიდოს, ეს ყოველგვარი დაბრკოლების გარეშე განხორციელდება.

2010-2011 – საქართველოს მთავრობამ დაიწყო საქართველოს ფოსტის პრივატიზაციის პროცესი და საბოლოოდ ეს უკვე კერძო კომპანია სააკაშვილის მთავრობის ყოფილ ფინანსთა მინისტრს – კახა ბაინდურაშვილს ჩააბარა. არაა გამორიცხული, რომ სხვა მიზნებთან ერთად ეს ფოსტის მეშვეობით ჟურნალ-გაზეთების გავრცელების კონტროლის მიზნითაც გაეკეთებინოთ. კერძო კომპანიას ერთ დღეს შეუძლია რაღაც მოგონილი მიზეზით უარი თქვას პრესის გავრცელებაზე, ან – უფრო ტექნიკურად, დისტრიბუციის ისეთი ტარიფი დააწესოს, რომელიც ნებისმიერი გაზეთის ბინაზე მოტანის შემთხვევაში მის ფასს გააორმაგებს. სანამ გაზეთები ჯიხურებში იყიდება, და ეს ჯიხურები საკმარისად მრავლადაა, გამოწერის პრობლემა დიდი პრობლემა არ უნდა იყოს, მაგრამ ჯიხურებზე ზეწოლის ახალი ნაბიჯები სწორედ ამჟამად ხორციელდება.

2011 წლის დასაწყისიდან, მას შემდეგ რაც ტელეკომპანია ”მაესტრომ” ლამის ერთწლიანი ბრძოლის შედეგად სატელიტური მაუწყებლობის ლიცენზია მიიღო, მთელი საქართველოს რეგიონების მასშტაბით დაიწყო  ”მაესტროს” მიმართ საკაბელო ტელევიზიების დაუსაბუთებელი უარის კამპანია, რის შედეგად თელავის, რუსთავის, ახმეტის და ბევრ სხვა ქალაქებში ”მაესტროს” გავრცელება შეიზღუდა. ხშირად საკაბელო კომპანიების თანამშრომლები კერძო საუბრებში აღიარებდნენ, რომ მათ ამ სახის დავალება სახელისუფლებო წრეებისაგან მიიღეს. თუ იმას გავითვალისწინებთ, რომ თბილისში ბოჭკოვანი ქსელების და კაბელური ტელევიზიის ორივე დუოპოლისტი  – ”სილკნეტი” და ”კავკაზუს ონლაიანი” – ტელეკომპანია ”მაესტროს” ჯიუტად არ რთავს თავის პროგრამების სიაში, აშკარაა, რომ როგორც კი მაღალსიჩქარული  ინტერნეტის და ტელევიზიის ერთობლივ პაკეტზე დემპინგური ფასებით მოხიბლულ თბილისელთა უმრავლესობა ამ საკაბელო ტელევიზიებიდან ერთ-ერთს აირჩევს, მათ მოუწევთ ცხოვრება „მაესტროს“ გარეშე და „მაესტროს“ მიღების ერთადერთი წყარო სატელიტური თეფში გახდება, რაც არც მაღალი ხარისხით იქნება გარანტირებული, და თანაც – საეჭვოდ ჩატარებული ტენდერის შემდეგ – ტელეანძის საეჭვო მფლობელს არაა გამორიცხული, საჭირო მომენტში (მაგალითად – არჩევნების დღეს!) ტექნიკური პრობლემების ”გაუჩნდეს”.

2011 წ. 26 მაისის ღამეს – ხელისუფლებამ არნახული სისასტიკით დაარბია უკვე არასანქცირებული, მაგრამ მშვიდობიანი მიტინგი რუსთაველზე. მიტინგის დარბევისას დაიღუპნენ მშვიდობიანი მოქალაქეები და პოლიციელი, რომელიც ოპოზიციის ლიდერს ნინო ბურჯანაძის კორტეჟის მანქანას დაბრალდა, თუმცა გამოძიებამ და ექსპერტიზის ეროვნულმა ბიურომ ეს ვერ დაადასტურა. მიტინგის დარბევის დროს ათობით ჟურნალისტის მიმართ პოლიციის და სპეცნაზის მხრიდან გამოყენებულ იქნა ფიზიკური და მორალური ძალადობის მეთოდები. ზოგიერთი უკანონოდ დააკავეს და უკვე განყოფილებაშიც სცემეს, ჩამოართვეს აპარატურა და გადაღებული მასალები. დღემდე ამ საქმის გამოძიება არ დასრულებულა.

2011 წელი ივნისიდან – საგადასახადო პოლიციამ დაიწყო უსასრულო (დღემდე დაუსრულებელი! მხოლოდ – შეჩერებული!) შემოწმება მედია ჰოლდინგ „პალიტრას“ 6 დამოუკიდებელ სტრუქტურაში. მართალია, დარღვევები ფაქტიურად ვერ აღმოაჩინეს, მაგრამ სურვილი ძალიან დიდი იყო, რომ „პალიტრა“ დაეხურათ და სავარაუდოდ „პალიტრა“ გადარჩა მხოლოდ იმ არნახული სოლიდარობისა წყალობით, რაც საზოგადოებამ, ჟურნალისტებმა და უცხოელმა დიპლომატებმა (განსაკუთრებით – აშშ საელჩომ) გამოიჩინეს. შემოწმების ბოლო ვადის დამთავრებამდე 4 დღით ადრე შეჩერებული შემოწმება შეიძლება ნებისმიერ მომენტში განახლდეს და ეს დამოკლეს მახვილი საგადასახადომ იმიტომ დატოვა  ”პალიტრის” თავზე, რომ მედია, რომელმაც 26 მაისის მიტინგის სისხლიანი დარბევის ბეჭდვითი და ვიდეომასალები გაავრცელა, მორჩილი გახადოს!

2011 წ. 7 ივლისს დაიწყო ე.წ. ”ჯაშუში ფოტოგრაფების” საქმე. დაკავებულ იქნა ის 4  ფოტოგრაფი (მათ შორის პრეზიდენტის პირადი ფოტოგრაფი), სწორედ რომელთა მიერ გადაღებულ იქნა და გავრცელდა  26 მაისის მიტინგის სასტიკი დარბევის ფოტომასალა. დაკავებულ იქნა ერთ-ერთი მათგანის მეუღლეც – ასევე ფოტოგრაფი, რომელიც მალე გაასამართლეს და 10,000 ლარის გირაოთი გამოუშვეს, ხოლო მისმა ქმარმა ნახევარ საათში ჯაშუშობის შესახებ აღიარებითი ჩვენება მისცა… აშშ საელჩოს ჩარევით დაკავებიდან მალევე გაანთავისუფლეს ”Associated Press”-ის თანამშრომელი შაჰინ აივაზოვი, რაც ადასტურებს, რომ ეს თათრი ძაფით ნაკერი საქმე პოლიტიკური შეკვეთა იყო და მართლაც რომ ჯაშუშობა ყოფილიყო, ამერიკის საელჩო ვერ მოითხოვდა ”რუსი ჯაშუშის” განთავისუფლებას(!). საბოლოოდ, ჟურნალისტებზე განხორციელებული არნახული ზეწოლის შედეგად საქმე საპროცესო გარიგებით დამთავრდა და „ჯაშუშები“ – საქმის დეტალების საიდუმლოდ შენახვის პირობით – გაანთავისუფლეს! თავისი ამ საქციელით სააკაშვილის ხელისუფლებამ დაადასტურა, რომ პოლიტიკურად არასასურველი მასალების გავრცელებისას ის ჟურნალისტების მიმართ ნებისმიერი იარლიყის მიკერებაზე წამსვლელია, თან ისე, რომ არც არაფერს დაამტკიცებს და დაადასტურებს (ერთადერთი ნივთმტკიცება იყო სიმბარათი, რომელიც ვითომ რუსეთის ფსბ თანამშრომელს ეკუთვნოდა და ბოლოს თბილისელი პენსიონიერის საკუთრება აღმოჩნდა).

2011 წ აგვისტო – სააკაშვილმა და ნაცმოძრაობამ საკუთარ კარის ბიზნესმენებს (კერძოდ – ძმებ შარანგიებს და ოფშორულ ზონაში დაფუძნებულ International Online Network-ს) საბოლოოდ ჩაუგდეს ხელში ორივე ინტერნეტ პროვაიდერი – სილქნეტი და კავკაზუს ონლაინი. ამავდროულად, კავკაზუსის მფლობელობაში მყოფი ორივე ინტერნეტ რესურსი – ITV.ge  და presa.ge ასევე ნაცმოძრაობის ერთგული პოლიციელ-ჟურნალისტ გურამ დონაძის პოლიციურ ტელევიზიას რეალ-ტივის მფლობელობაში გადავიდა.

2011 წლის ნოემბერი – თბილისის მერიამ წამოიწყო ტენდერი, რომ გაანადგუროს ის რამდენიმე ათეული პრესის ჯიხური, რომელიც გიგი უგულავას და ნაცმოძრაობის კონტროლის გარეთ რჩება. სატენდეროდ გამოცხადდა სწორედ ის ადგილები, სადაც ათეული წლებია „პლანეტა ფორტეს“, „ელვა-სერვისის“ და „მაცნეს“ პრესის ჯიხურები იყო განთავსებული. ელექტრონული ტენდერის ჩატარების მომენტში სერვერი გაითიშა და ზოგიერთმა მსურველმა მონაწილეობა ვერ მიიღო. ძველი ჯიხურები 2 დღეში ასაღებად გამოაცხადეს (მიუხედავად იმისა, რომ მათ აბსოლუტურ უმრავლესობას სრულიად სამართლიანად აქვს შეძენილი ეს ჯიხურები), ხოლო ახალი ჯიხურის მეპატრონეებს სრული თავისუფლება მიანიჭეს, რომ გაყიდონ იქ ნებისმიერი პროდუქტი (ხელისუფლების ერთ- ერთი პროპაგანდისტული მედიასაყვირის – ჟურნალ ”ტაბულას” მთავარი რედაქტორის და ამავე დროს ქვეყნის უშიშროების მდივნის გიგა ბოკერიას თანამეცხედრის – თამარა ჩერგოლეიშვილის განცხადებით არაა გამორიცხული, რომ ჯიხურებში შაურმა, ან ცოცხები გაიყიდოს, როგორც საკუთრების ახალი  მფლობელი გადაწყვეტს).

ყველა ზემოთხსენებული შეზღუდვების და პრესის გავრცელების თანდათანობით შევიწროების გამოყენების ფონზე ხელისუფლებამ მწყობრ ლეგიონად აქცია სახელისუფლებო პროპაგანდისტები, რომელთაც ერთადერთ ამოცანად საქართველოს მოსახლეობის დაბრმავება, დაყრუება და მოტყუება დაუსახა, და რომლებიც ამ ამოცანას მართლაც შესაშური  ერთგულებით ასრულებენ.

ერთ-დროს ხელისუფლების ქმედებების კრიტიკით ცნობილი იმედის ტელევიზი გაცილებით უფრო ცნობილი გახდა 2010 წლის 13 მარტს, როდესაც მისმა ხელმძღვანელობამ ერთერში ე.წ. რუსეთთან მოდელირებული ომის ქრონიკა ისე გაუშვა, რომ მაყურებლები არ გაუფრთხილებია, რამაც საქართველოში მასიური პანიკა გამოიწვია. მოგვიანებით ინტერნეტში გაჩნდა აუდიოჩანაწერი, სადაც სავარაუდოდ არხის გენერალური დირექტორი, სააკაშვილის აპარატის ყოფილი უფროსი გიორგი არველაძე სავარაუდოდ არხის საინფორმაციო უზრუნველყოფის უფროსს ეკა წამალაშვილს ეუბნებოდა, რომ ”მიშას” სურვილია, სუბტიტრებით არ წასულიყო წარწერა, რომ ეს მოდელირებული, და არა რეალური ომის სცენები იყო! აღნიშნულის შესახებ ასევე არ ჩატარებულა გამოძიება, ხოლო ოპოზიციის მიერ ინგლისის ცნობილ კერძო ფირმაში ჩატარებულმა ექსპერტიზამ დაადასტურა, რომ სავარაუდოდ ჩანაწერი ავთენტური იყო.

www.news.bbc.co.uk/2/hi/8566571.stm

http://www.rferl.org/content/Saakashvilis_Erratic_Response_To_Invasion_Hoax_Raises_Suspicions/1984530.html?page=2 

ხელისუფლების, სავარაუდოდ – შსს მინისტრის ვანო მერაბიშვილის მონაწილეობით შეიქმნა პოლიციელებით დაკომპლექტებული ტელევიზია – რეალ-ტვ, რომელსაც ადამიანის უფლებების დარღვევების შესახებ აშშ სახ.დეპარტამენტის ანაგარიშებში მრავალჯერ მოხვედრილი ექს-ჟურნალისტი და რეალურად ხელისუფლების სადამსჯელო მანქანის ერთ-ერთი უგვანო პირი – გურგენ დონაძე ხელმძღვანელობს.

www.humanrights.ge/index.php?a=article&id=4664&lang=en     www.civil.ge/eng/article.php?id=11921

ხელისუფლების პროპაგანდისტული მანქანის ამ კოჰორტას ავსებენ გიგი უგულავას ცოლისდის მიერ მართული ”პრაიმ-ტაიმი” და სახელისუფლებო დოტაციაზე მყოფი, ერთ დროს პოპულარული და ამჟამად აბსოლუტურად ურეიტინგო – ”24 საათი”. ეს სწორედ ის ბეჭდვითი მედია-საშუალებებია, რომლებიც მერიის მხრიდან პრესის გამავრცელებელ ჯიხურებზე და ინფორმაციის მიღების თავისუფლებაზე ბოლო შეტევის დროსაც კი სოლიდარობას არ უცხადებენ სხვა ჟურნალისტებს, რადგან ისინი თავად არც არიან ჟურნალისტები, ისინი პროპაგანდის ნაცისტურ-ბოლშევიკური ტრადიციების გამგრძელებლები არიან და მათ მერიის ეს ნაბიჯი თავიანთი მომავლის საფრთხედ, გაზეთების დისტრიბუციის და კონსტიტუციის 41-ე და 42-ე მუხლების დარღვევად არ მიაჩნიათ.

დაბოლოს, 2011 წლის 30 ნოემბერს, დილის 07:15-ზე ტელეკომპანია ”მაესტროს” მმართველი კომპანიის დირექტორი ეროსი კიწმარიშვილი 10 დაუდგენელ პირთან ერთად შეიჭრა დამოუკიდებელი კომპანია ”მაესტროს” ტერიტორიაზე, არ მისცა ”მაესტროს” თანამშრომელ ჟურნალისტებს ტელეკომპანიის ტერიტორიაზე შესვლის უფლება, გამოაცხადა, რომ მმართველობიდან აძევებს კომპანიის დამფუძნებლებს და გენერალურ დირექტორს (რისი უფლებაც წესდებით არ ჰქონდა!), გამაგრდა შენობაში პოლიციის დახმარებით, რომელიც არ ამხელს, ვისი ბრძანებით მოქმედებს, და ფაქტიურად თავისი რეიდერული დაპყრობით ჩაშალა ”მაესტროს” გადაცემები. აღნიშნული ძალიან ჰგავს რუსეთის ხელისუფლების მიერ ტელეკომპანია ნტვ-ს რეიდერულ დაპყრობას. საქართველოს ხელისუფლება ისეთ პოზას იჭერს, რომ ეს თითქოს დამოუკიდებელი კომპანიის დამფუძნებლებსა და მმართველს შორის მიმდინარე ყოფითი გაუგებრობაა, შინაგან სამინისტროს პრესს-სპიკერი მთელი დღე ტელეფონს არ იღებს და აცხადებს, რომ არ იცის,ვის უნდა მიმართონ დაზარალებულმა დაფუძნებლებმა და ”მაესტროს” ჟურნალისტებმა.  სავარაუდოდ, ხელისუფლების მოთმინების ფიალა აავსო იმან,  რომ 29 ნოემბერს ”მაესტროზე” გავიდა ხელისუფლების მთავარი თავის ტკივილის – ახალი ოპოზიციონერი კანდიდატის – მილიარდერი ბიზნესმენის და ფილანტროპის – ბიძინა ივანიშვილის ინტერვიუ. ხელისუფლებამ მოთმინება დაკარგა და ეროსი კიწმარიშვილის ხელით თავისუფალი სიტყვის და აზრის გამოხატვის ერთ-ერთი ბოლო კუნძულის მოსპობას შეეცადა. ხაზი უნდა გავუსვათ, თავის პირველივე გამოსვლებში ბატონი ივანიშვილი საკმაოდ უარყოფით აზრებს გამოთქვამდა ბ-ნი კიწმარიშვილის როლზე, რომელმაც დააფუძნა ოპოზიციური პარტია – ” ქართული პარტია”, რომლის მთავარი მოქმედების გეგმა პრეზიდენტ სააკაშვილის რეჟიმის ქუჩის აქციებით დასრულება იყო. გასაგებია, რომ კიწმარიშვილის და ხელისუფლების ინტერესები, სულ ცოტა, ერთმანეთს დაემთხვა. ხელისუფლება ისევ ცდილობს სხვის ზურგს ამოფარებულმა მოახერხოს დამოუკიდებელი მედია საშუალების დაპატრონება, დამუნჯება და არჩევნების წინ საზოგადოების სრულ ინფორმაციულ ვაკუუმში გადაყვანა.

აუცილებელია, მივმართოთ ყველა უფლებისდამცველ ორგანიზაციებს, ჟურნალისტთა თავისუფლების დამცველ პროფესიულ ორგანიზაციებს, ევროპის საბჭოს, ეუთო-ს, Human Rights Watch-ს, Transparency International-ს, საქართველოში განთავსებულ დიპლომატიურ კორპუსს – მისცენ შეფასება მიხეილ სააკაშვილის და მის მიერ მართული ნაცმოძრაობისა და მთავრობის მთელ რიგ მწყობრ, დესტრუქციულ, უკანონო და პროვოკატორულ მოქმედებებს, რომლებიც მიზნად ისახავს საქართველოს მოსახლეობისათვის თავისუფალი ინფორმაციის შეზღუდვას, ჟურნალისტთა საქმიანობის დაბლოკვას და მათთვის პროფესიულ საქმიანობაში ხელის შეშლას, ჟურნალისტების დაშინებას, ცენზურისა და თვითცენზურის დამკვიდრებას, მედია საშუალებების ტოტალურ კონტროლს და მედიის პროპაგანდისტულ მანქანად ქცევას, იმ მანქანად, რომელიც განამტკიცებს მითს მიხეილ სააკაშვილის მიერ საქართველოში თავისუფალი და დემოკრატიული სამოთხის აშენების შესახებ…

No Lie Can Live Forever!


Mein Kampf – გადამწყვეტი ბრძოლა საქართველოსთვის (რეალობასთან ძალიან მიახლოებული მოდელირება)


(სამობილიზაციო სხდომის სტენოგრაფიული ჩანაწერი)

კანცელარიის დარბაზი. ერის ასამდე რჩეული. დარბაზში სიჩუმეა. ჟღერს ნაციონალური ჰიმნი – „დარია თუ ავდარია“…

გაღიმებული ბელადი ტრიბუნაზე ადის და ისტორიულ შეხვედრას იწყებს:

–         თანამებრძოლნო!

უკვდავი პარტიის ლეგიონერებო!

დემაგოგიის სწორუპოვარო ლექტორებო!

ზონდერ-ბრიგადირებო, სოდელებო და კუდელებო!

საქართველოს ჩამოუშლელი ხელისუფლების ყველაზე ერთგულო შვილებო!

–         თქვენი დაუძინებელი ბელადი მოგმართავთ თქვენ!

არასოდეს არ გვქონია ისეთი სერიოზული გამოცდა, როგორიც წინ გველის!

მტერი არამარტო განუზომლად მდიდარია, არამედ ვერაგიც! ის ცდილობს იმ ტერიტორიაზე შეგვებრძოლოს, სადაც ჩვენ – ჩვენი დახვეწილი და მრავალნაცადი სისტემის წყალობით, – ყოველთვის წინასწარ გამარჯვებულები ვიყავით! მას უნდა, არჩევნები მოგვიგოს. ჩვენი მიზანი უნდა იყოს, მოვახერხოთ და გადავაგდოთ მტერი ქუჩის აქციების ფრონტზე და შემდეგ ჩვეული მეთოდებით დავამარცხოთ, გავსრისოთ და მივაკეროთ რუსეთის და კრემლის აგენტების ის იარლიყები, რომლებიც 2006 წლიდან გვაქვს ათასობით დამზადებული და შენახული ეროვნული ბანკის სავალუტო საცავებში…

სამწუხაროდ, საგარეო ფაქტორები ისე ვითარდება, რომ ჩვენი მოკავშირეები ყველგან უკანა პლანზე არიან გადასროლილები და მათ მაგიერ უნიათო, რუსების მლოკავი საცოდავი პოლიტიკანები მძლავრობენ. მაგრამ გარწმუნებთ, ჩვენი საბოლოოდ გაწირვა მათაც კი არ მოუვათ თავში აზრად – სხვა ვინ გაუგზავნით ასე უხვად საზარბაზნე ხორცს?! სხვა ვინ დაუდგამს მათ ყოფილ პოლიტიკოსებს ძეგლებს? სხვა ვინ იქნება რუსეთის წინააღმდეგ ყველა აქციის ასეთი ერთგული შემსრულებელი და თავის თავზე დარტყმების მიმღები, თუ არა საქართველო? ჩვენი – ნაცმოძრაობის – საქართველო!

ნუ შედრკებით, ჩემო ერთგულო ცერბერებო! ჩვენ დიდი გამარჯვებები გველის წინ. ნაციონალური მოძრაობა, როგორც ფენიქსი, აღდგება და ისევ მოიხვეჭს ძლევამოსილ გამარჯვებებს შინ და გარეთ! დედას და ბებიას ვფიცავარ, ჩვენი დიადი ბატონობა და საქართველოს მესაჭეობა 100-წლოვანი იქნება და ათასწლეულებს გასწვდება ჩვენი დიდება!

მინდა გაგანდოთ გეგმა, რომელიც ჩვენმა პარტიის რუხმა კარდინალმა ლევან რამიშვილმა, ნაციონალური მოძრაობის უსაფრთხოების მწონავმა გიგა ბოკერიამ, იუსტიციის მინისტრმა ბატონმა ზურა ადეიშვილმა და მე, თქვენმა ბელადმა, შევიმუშავეთ. ბატონი ვანო მერაბიშვილიც გვესწრებოდა, რა თქმა უნდა, როცა კი შეძლო…

შევიმუშავეთ სამი მიმართულება – შეტევითი, თავდაცვითი და მედიის. ყველა მიმართულებას მე ვუხელმძღვანელებ! ასე აჯობებს! ქვეყნისთვის, პარტიისთვის და ჩემთვისაც!

შეტევითი მიმართულება რამდენიმე ვექტორს მოიცავს:

1) ჩვენი ეროვნული გმირები – დათა და ბაჩო ახალაიები ქმნიან ე.წ. ახალ ნებაყოფლობით რეზერვს, რომლის ბირთვი უკვე გადის წვრთნებს სამეგრელოს ტყეებში. იარაღის ნაწილი დარიგებული აქვთ. დივიზიის მეთაურად დავნიშნე დავით შენგელია, რომელმაც ერთგულების ფიცი მოგვცა. თუმცა ერთგულების ფიცის გარეშეც ვერ გაბედავს ვერაფერს, თორემ დაბრუნდება ოცწლიანი „სროკის“ მოსახდელად. მე მივეცი ბრძანება ფინანსთა მინისტრს და უკვე მოინახა ბიუჯეტში 45 მილიონი ლარი ამ ახალი ძალოვანი უწყების დასაფინანსებლად. სამეგრელოს სარეზერვო დივიზიის მიზნებში შედის სამეგრელოს მასშტაბით „ქართული ოცნების” ნებისმიერი პოლიტიკური აქტივობის ძირშივე ჩახშობა და ლიდერებთან გასწორება. მოქმედება ძირითადად ღამით უნდა ხორციელდებოდეს. სამეგრელო ჩვენი ვანდეა უნდა გახდეს! ვერავინ ვერ უნდა ბედავდეს სამეგრელოში ნაციონალური მოძრაობის წინააღმდეგ ხმის ამოღებას. სამეგრელო უნდა გახდეს პოლიგონი იმისთვის, რასაც შემდეგ ბათუმში, ქუთაისში, თელავში, თბილისში განვახორციელებთ.

2) ანალოგიურად იმოქმედებს უფრო მცირე მოცულობის ზონდერბრიგადები გორში – ბასიშვილის, თბილისში – ნიკა რურუასი, ბათუმში – მაიმუნასი, სიღნაღში – ადეიშვილის სახელობის. მათ კოორდინაციას ბატონი გია უდესიანი განახორციელებს, რომლის გამოცდილებას და დაუნდობლობას ბოლომდე ვენდობი. მათ შედარებით უფრო დამზოგველ რეჟიმში მოუწევთ მუშაობა. თუმცა გორის რაიონში თუ ლტოლვილები ამოიღებენ ხმას, ურტყით ბოლომდე! გადავყევი ამ უპატრონოებს – ასეთი ფანტასტიური სახლები ავუშენე, ერთი წელი დენის ფულს ვუხდიდი! მეტი რა ჯანდაბა უნდათ? რატომ არ არიან მადლიერნი? მოკლედ ამოვიდა ყელში მაგათი უმადურობა – ვაცხადებ ნულოვან ტოლერანტობას ლტოლვილებზე! ჩვენ უნდა მოვახერხოთ ლტოლვილების საბოლოდ ელარჯივით ამოზელა მორჩილ და მუნჯ მასად!.. – ხელისუფლების უპირობო მხარდამჭერებად! ლტოლვილი უნდა იყოს ადამიანი, რომელიც 100%ით დამოკიდებულია საქართველოს ერთიან ნაციონალურ მოძრაობაზე და რომელიც მონურად უნდა იყოს ჩვენი მორჩილი!.. ისეთ დღეში უნდა ჩავაგდოთ თითოეული ურჩი, რომ მართლა ფოცხოეწერის მიწის ჭამა მოენატროთ!.. ამ სამუშაოების დასაფინანსებლად მე უკვე ველაპარაკე მერი უგულავას და მან 14 მილიონით შეამცირა განათლების და ჯანდაცვის ხარჯები. სწორედ ეს დაზოგილი თანხა წავა ზონდერბრიგადების ახალი კადრების რეკრუტირების და წახალისებისათვის! გაზარდეთ ერთ სულ ნაცემზე პრემიის მოცულობა, ხოლო თუ ვინმე „ჩავარდება“ და ჟურნალისტები დააფიქსირებენ – პირიქით, გარიცხეთ ზონდერბრიგადიდან და ბანკში წინასწარ დაგირავებული სახლი გააყიდინეთ! უდესიანს ეგ ოპერაციებიც კარგად აქვს ათვისებული.

3) ბატონი ვანო მერაბიშვილის ფუნქცია იქნება ძალის ტოტალური დემონსტრაცია, განსაკუთრებით თბილისში. ოღონდ მშვიდად და ექსცესების გარეშე! ყველგან, სადაც კი მოხდება ჩვენი მოწინააღმდეგეების შეკრება, უნდა მოხდეს პოლიციის და სპეცნაზის დემონსტრირებაც – სამხედრო აღჭურვილობით – იყონ კარაბინერებივით აღჭურვილი, – ავტომატებით, ჩაჩქანებით… გამოიყვანეთ სპეცნაზის ნაწილები – იგივე ძაღლების კამუფლიაჟით, როგორც 7 ნოემბერს, რომ მეხსიერება აღუდგეთ… იმ ოლიგარქის ყრილობის დღეს დააყენეთ ფილარმონიასთან სამხედრო ტექნიკის რამდენიმე ერთეული და წყლის ჭავლიანი მანქანებიც, რომ ყველა მომსვლელმა შიში იგრძნოს! ჩვენ უნდა დავთესოთ შიში! გაავრცელეთ ხმები, რომ მოსალოდნელია ყრილობის დარბევა! რამენაირად უნდა შევძლოთ, რომ ძალიან ცოტა ხალხი მოუვიდეთ ყრილობაზე. დარბაზი თუ არ შეივსება – ძალიან კარგი იქნება, მაგრამ თუ შეივსო, ის მაინც უნდა მოვახერხოთ, რომ ქუჩაში არავინ იყოს. ამავე დროს – არავითარი ისეთი ზეწოლა, რასაც ვინმე დააფიქსირებს. ფსიქიური შეტევა უნდა განახორციელოთ მხოლოდ. არ გაბედოთ, რომ ვინმეს რამე გაუკეთოთ და ეგ არაკონტროლირებადმა მედიამ დააფიქსიროს! ეხლა ეგ მაკლია, კიდე ელჩები ესტუმრონ – უკვე საავადმყოფოში – მაგათ დაჭრილებს! დაიმახსოვრეთ, სხვა რეალობაა! ექს-პრემიერ-მინისტრს რომ ვურტყით და შეგვრჩა იმ პირის მოუძებნელობა, ეხლა ასე არ გამოვა. ვინც ჩავარდება, იძულებული ვიქნებით დავაკავოთ და სულ რო მელნიკოვის რანგის დამსახურება ჰქონდეს – გავასამართლოთ! პირიქით, დაგეგმეთ პროვოკაციები, რომ ვინმემ სპეცნაზს ქვა ან ბოთლი ესროლოს. ამაზე დაიჭირეთ ვინმე! აჯობებს, თუ დაჭერილი ტერორისტი რუსული გვარის იქნება. ორ კურდღელს დავიჭერთ… ვანო, რამე არ წაგცდეს და არ შეგეშალოს, თორემ ცოლთან ერთად სვანებს გადაგცემ… გეხუმრე, რა თქმა უნდა!…

4) შეგზავნეთ ხალხი მოწინააღმდეგეთა ბანაკში. არა აქვს მნიშვნელობა, ვინ რა ინფორმაციას მოახერხებს, გამოიტანოს. მთავარია, რომ შეგზავნოთ. თუ გამოაშკარავდებიან, ეგეც არაა ცუდი! ამით იმასაც მოვახერხებთ, რომ ყველა ახალმოსულის მიმართ უნდობლობა ექნებათ…

5) ბანკის დაძირვა არ გამოდის! არავინ არ მირჩევს! ცუდი რეზონანსი იქნებაო… მთელი საბანკო სექტორი მიჰყვებაო! არადა, არ ვარ დარწმუნებული… რა ვიცი, ბადრის დროს კი უმტკივნეულოდ გადავყლაპეთ… არც არავინ შექანებულა სხვები!.. კახი კალაძე ამოიღეთ ყველა რეკლამიდან! შორენა ბეგაშვილმა თქვას, რომ კახის აძლევდა… გაავრცელეთ ხმები, რომ კახი საქართველოშიც და იტალიაშიც თამაშებს ყიდდა! ჩაჯექით ორივე ბანკში და ყველა გადარიცხვა აკონტროლეთ, ეცადეთ, ეგებ გაყიდონ… ვინმე მყიდველი მიუგზავნეთ. იქნება ფრანგებს მიყიდოს – „სოსიეტე ჟენერალს“, მაგალითად … ეს მაგის ბანკი ძაან მანერვიულებს… ფულის ონკანი რომ დამაკეტინა, ის მინდა… შეიძლება მაინც მოგვიწიოს ბანკის დაკეტვა, დროებით მაინც… რომ არაფერი ითქვას, იქნებ რამდენიმე ჩვენიანი ბანკიც მივაყოლოთ. ნიკა, უთხარი შენ ძმას, რომ  სულ ერთი კვირით დავკეტავთ, ვითომ წყალგაყვანილობა გასკდა ახალ ოფისში, უცხოელებს კო ვეტყვით, რომ სიტიბაკიდან და დოიჩე ბანკიდან ფულის გათეთრების საქმეს ვსწავლობთ… შენ კიდე, რაიმე მოიფიქრე, შე ჩემა, ეროვნული ბანკის დირექტორი ხარ თუ გააზნაურებული მდაბიო!

6) კოდუას გამოყენებაზეც ვფიქრობ… ძაანაც არ უნდა გავმეორდეთ… თუმცა, იქნებ გამოვიყენოთ კიდეც… მაგ ოჯახში ბევრნი არიან… უკვე დავიწყე გიორგისთან მუშაობა, მაგრამ ალბათ არ ჩაყლაპავენ ამ ანკესს…

7) როცა არჩევნები ჩატარდება, მე საზღვარგარეთ ვიქნები და დავით ბაქრაძე და ახალაია რამდენიმე დღით სამხედრო მდგომარეობას გამოაცხადებენ. მიზეზი მოინახება. ბოლო-ბოლო გორიდან 1-2 გასროლას განვახორციელებთ ცხინვალის მიმართულებით, რუსების რამდენიმე ტანკის გადმოსვლა საკმარისი საბაბი იქნება. ზურას მანამდე უკვე 1 მილიონი ახალი პირადობის მოწმობა ექნება დაბეჭდილი, ხოლო ვანოს – 1 მილიონი წინასწარ შემოხაზული ბიულეტენი ჩაყრილი ყუთებში… გიგის თავისი მდედრიონის მობილიზაცია არ გაუჭირდება. არა მგონია, დიდი ხმაური ატყდეს. ბოლო-ბოლო საზღვარგარეთაც რაიმეს გავითამაშებთ, ლონდონში ვინმე მესვრის… და ყველას ვეტყვით, რომ რუსეთს ისევ უნდოდა regime change! მთავარია, ეკლესიის ნეიტრალიზაცია მოხერხდეს. ამაზეც ვიმუშავებთ, სოსოს ჰყავს ხალხი, ვისთანაც მუშაობს. შენი იმედი მაქვს, სოსო… შვილი გაიხსენე…

თავდაცვითი მიმართულების კოორდინატორად ვნიშნავ ბატონ გია ნოდიას. ბატონი გია თავით ფრჩხილებამდე ჩვენი ერთგულია, ფილოსოფოსი კაცია და დასავლეთში სერიოზული ექსპერტის რეპუტაცია აქვს. მასზე ვერ იტყვიან, ნაცმოძრაობის წევრიაო. ბატონი გია ლევან რამიშვილზე იქნება მიმაგრებული. აქ ხუთი ვექტორი გვექნება, სავარაუდოდ:

ა) უნდა გავაძლიეროთ რამდენიმე თემა – ოჯახური ძალადობა,ბავშვებზე ძალადობა, რელიგიური ტოლერანტობა, სექსუალური უმცირესობები. უნდა ჩავატაროთ რამდენიმე დიდი კონფერენცია ამ საკითხებზე, უნდა დავბეჭდოთ ამ კონფერენციების ანგარიშები. ჩამოვიყვანოთ ბიბისი და ლარი კინგი… მოვიწვიოთ უცხოელი ექსპერტები და ყველგან უნდა ვილაპარაკოთ, რომ სწორედ ამ რამდენიმე საკითხის გადაჭრაღა დაგვრჩა დემოკრატიის პრინციპების სრულ ზეიმამდე საქართველოში!

ბ) აუცილებელად უნდა გავაძლიეროთ კონტაქტები იმ უცხოელ ექსპერტებთან, რომელთაც რუსეთთან გადატვირთვა არ მოსწონთ – ჯეიმსთაუნ ფაუნდეიშენი მარტო ვლადიმერ სოკორი ხომ არ არის? რადგან რონ ასმუსი აღარ გვყავს, ხელები უნდა ჩამოვუშვათ? მონახეთ ვინმე ამბიციური ახალგაზრდები, ვინც სიამოვნებით დაწერდა რაიმე წიგნს რუსეთის საშინელ რეჟიმზე და იმპერიის მოახლოებულ კრახზე. აუცილებელია ასეთი ხალხის გვერდში ამოყენება. ჩამოვიყვანოთ, ვაზიაროთ ჩვენს სუფრას… ვინმე შევრთოთ… ამაში თუ საჭიროა, მეც დაგეხმარებით… ვაჩუქოთ ქორწილზე ბეჭედი, ახალი პორშე, ბინა ბათუმში… ასე უნდა ვეძებოთ კადრები! კადრები წყვეტენ ყველაფერს!

გ) ამოსაწევია ის მდიდარი რესურსი, რაც ქალბატონ მანანა გამსახურდია-არჩვაძეს გააჩნია. ახლა, როცა კოკო აღარ გვყავს თბილისში, ქ-ნი მანანა გამოვიყენოთ! შეხვდით ამ ქალს, ოღონდ მაინცდამაინც რურუას ნუ შეახვედრებთ… შეახვედრეთ ეკა ხერხეულიძე, ხათუნა ოჩიაური, სევდია უგრეხელიძე – სხვა სერიოზული ადამიანები. ჩავატაროთ რაიმე სერიოზული კონფერენცია თემაზე – „ზვიად გამსახურდია – საქართველოს სულიერი მესია“… რაა? მესია კი არა, მისია? ასე ერქვა წიგნს? ნუ წიგნს ისე ერქვა და ჩვენ კონფერენციას ასე დავარქვათ… მანანას გაუხარდება მესიის ცოლის სტატუსი… თუ საჭიროა, გურამ აბსნაძეც ჩამოვიყვანოთ! რას ჰქვია, არ ჩამოვა! ისეთ რამეს გავახსენებთ, ჩამოვა! ისიც… მივიყვანოთ ბოლომდე ის კოკოს გამოძიება. მაშინ ვერ მოვიფიქრეთ, ეს სერიოზული საქმე ვისზე დამთავრებულიყო და ახლა ყველაფერი აშკარაა, ვისზეც დამთავრდება!.. ზურა! ამ საქმეში შენ უნდა ჩაერთო… თქვენ გაქვთ ყველა მასალები, ჩაატარეთ რამდენიმე ექსპერტიზა, დაკითხეთ, ვინც საჭიროა… მალხაზ გულაშვილი არ დაგავიწყდეთ, ამ კაცს თანამშრომლობის სურვილი აქვს… უნდა, რომ დაგვეხმაროს და მივცეთ საშუალება.. სწორ გზაზე დავაყენოთ… აუხსენით, შეახსენეთ… მე დარწმუნებული ვარ, რომ იმ ტრაქტორებამდე, იმ ოლიგარქს ტანკებიც ექნებოდა გამოგზავნილი… სწორედ ეს უნდა ახსოვდეს გულაშვილს!.. შეახსენეთ თქვენებურად… ფოტოებს დონაძე მოგაწოდებთ, მაგას ყველას და ყველაფრის ფოტოები აქვს ფოტოშოფში… სასამართლო პროცესი ზუგდიდში აჯობებს!.. სამეგრელოსთვის მარტო მათრახი კი არ მემეტება! (იცინის სპეციფიური სიცილით). ეს პროცესი მეგრელებისთვის თაფლი იქნება! ნაცემარ ჭრილობებზე წასასმელი თაფლი (სიცილი დარბაზში, კობა ხაბაზის სოლო სიცილის თამადობით)

დ) ძალიან მნიშვნელოვანია საზღვარგარეთ მცხოვრები ჩვენი დიასპორის კეთილგანწყობა. ამ მიმართულებით პროგრესი შენელდა… ჩავატაროთ კონფერენცია ბათუმში, ჩამოვიყვანოთ ჩვენი ერთგული ექსპატრიატები. ისეთი პატივი ვცეთ, თავი სამოთხეში ეგონოთ! განსაკუთრებით ოთარ ზურაბიშვილის იმედი მაქვს! კარგი იქნება, თუ ილიას უნივერსიტეტი მას საპატიო დოქტორობას მიანიჭებს. მე დაველაპარაკები გიგის. სწორედ დიასპორამ უნდა იძახოს, რომ წინააღმდეგნი არიან რუსი ოლიგარქის! ამის ფონზე კარგი იქნება, თუ ხალხი მასიურად დაიწყებს იმ ოლიგარქისგან აღებული ფულის დაბრუნებას. სხვათაშორის, მე უკვე ველაპარაკე ექიმ თოდუას და ვფიქრობ, ის სწორ გადაწყვეტილებას მიიღებს ხვალისთვის. თუ არადა, ჩვენ მივიღებთ სწორ გადაწყვეტილებას!.. ზოგიერთებს დაავიწყდათ, რომ ჩვენგანაც აქვთ საჩუქრები მიღებული. ჰოდა, თუ იქეთ ვერ  აბრუნებს ნაჩუქარ ფულს, ჩვენ დაგვიბრუნებს ნაჩუქარ შენობას! (სიჩუმე დარბაზში)… მოკლედ, ემიგრანტების კონფერენცია გვინდა. იქნებ, ემიგრანტების პარტიის დაარსებაზეც გვეფიქრა – რამე ისეთი, მოოპოზიციო პარტია რომ იყოს… შეუძლიათ ცოტა გვაგინონ კიდეც… საქმისთვის გვჭირდება…

ე) მოქალაქეობის საკითხი უნდა სერიოზულად დაამუშავო, გია ჩემო! ფილოსოფოსი კაცი ხარ, მოქექე არგუმენტები, პლატონიდან და სოკრატედან დაიწყე თხრა, იქნებ რამე პრეცედენტი იყო! ცისკარიშვილი შეგიძლია გამოიყენო, მაგას ჰქონდა კარგი არგუმენტი – ისრაელში რომ პალესტინის მოქალაქე ჩავიდეს და პარტია დაარსოს, რა მოუვაო! კეზერაშვილს დავურეკავ, იქნება ვინმე ებრაელი ექსპერტები ჩამოვიყვანოთ და ვალაპარაკოთ… მაგრამ ამ დამპალი ფუქსის და ფრენკელის გამო ებრაელებს ცხვირი აქვთ მაღლა აწეული…

მოქალაქეობას კი მაინც არ მივცემ! პატრიარქმა კი არა, სულაც რომის პაპმა რომ მთხოვოს! ბასტა!..

მიაშავეთ მის ცოლს მოქალაქეობა! ოღონდ ჯერ საჩივარი უნდა გამოიტანოს სასამართლოდან! ის დეგენერატი ვაშაძე მოაშორეთ რეესტრიდან, ამხელმა სირმა ის როგორ ვერ გაარკვია, მის ცოლს რა როდის ჰქონდა მიღებული… სწორი იყავი ვანო, სირიაო, რომ მეუბნებოდი შარშან! განცხადება დაწეროს და სადმე გრენლანდიაში სასწავლებლად გაუშვით!.. ეგ დეგენერატი, ეგა…

დაბოლოს, მედიის მიმართულება. აქ თენგო გოგოტიშვილი დაგვეხმარება კოორდინაციაში. ნატო დროებით მოიცდის, რადგან აქ თუ ვერ გავიმარჯვეთ, ვერც ნატოში შევალთ და ვერც – კატოში! (სპეციფიური, ნერვული სიცილი)

1. არცერთი არაკონტროლირებადი პრესის ჯიხური თბილისში!! არც ერთი!! მოვა დრო და ეს იქნება ჩვენი გამარჯვების საწინდარი… არჩევნების შემდეგ დღეს უეცრად გაითიშება „მაესტროც“ და „კავკასიაც“! ხოლო ჩვენს მიერ უკვე სრულად კონტროლირებად ჯიხურებში არ გაიყიდება არც „კვირის პალიტრა“, არც „რეზონანსი“, არც – „ლიბერალი“… უფრო სწორედ მათი მთელი ტირაჟი დილის 8 საათზე უკვე „გაიყიდება“ და აორთქლდება კიდეც! რა თქმა უნდა, იჩივლებენ, მაგრამ სანამ სასამართლო იქნება, ჩვენ ჩვენს გამარჯვებას გავინაღდებთ და წერენ და იკითხონ მერე.

2. თეფშების შესახებ გაუშვით ჩვენს სამივე არხზე სიუჟეტები, რომ სატელიტურ თეფშებს გამოსხივება აქვს და კიბოს და შიდსს იწვევს! მერე ერთ კვირაში აკრძალეთ თეშების შემოტანა და ამოიღეთ ყველა სატელიტური თეფში მოსახლეობიდან. რეგიონებში უნდა დავაყრუოთ და დვაბრმავოთ ხალხი! საბოლოოდ კი არჩევნების წინ „მაესტრო“ და „კავკასია“ თბილისშიც გაითიშება. „მაესტროს“ – ტექნიკურად გავთიშავთ. ანძიდან ეს მარტივია. ანძა უკვე ჩვენია. „კავკასიაზე“ მართლმადიდებლები მიიტანენ იერიშს, სწორედ არჩევნებამდე რამდენიმე დღით ადრე გამოვუშვებთ იმ დაპატიმრებულ მორწმუნეებს. კორიდის ხარებივით გამოვარდებიან… მანამდე კი ორივე ტელევიზიაზე უნდა ვიმუშავოთ – ჩვენი ხალხი უნდა ჩაინერგოს, გამოცდილი კადრები… რომ საჭირო მომენტში, თუ სიტუაცია დაიძაბება, ალაპარაკდნენ, რომ ტელევიზიის უფროსები აშანტაჟებდნენ და წნეხის ქვეშ ამუშავებდნენ, რომ ნახეს შავი ფულის გათეთრება… ოკულტიზმი ახსენეთ… ცაგარელი გამოაცხადეთ შავი მაგიის  მაგისტრად… ღლონტი და აქუბარდია – მასონებად… ჩვენმა კადრებმა კი თქვან, რომ ნახეს ტელესტუდიებში როგორ მოდიოდნენ რუსეთის კგბ-ს ინსტრუქტორები… პანფილოვმა გადაიღოს თავისი საბუტილნიკები რამდენიმე… რუსული ინსტრუქციების ფოტოები დაგვჭირდება…რუბლები ჩადეთ მეშოკებში და დააგდეთ სადმე… ამერიკელებზე მაგარი ეფექტი ექნება, სოსოს ამოღებულ რუბლებს რომ გავშლით მაგიდაზე! რაღაც ეგეთი ამბები… თენგო, ისე უნდა იმუშავო, როგორც მაშინ, რუსის სალაგას ოქრის კოვზი რომ ამოუღე ჯიბიდან!… კოვზი – იქნება! თუ არ იქნება, თავად უნდა გქონდეს ჯიბეში! ტყუილად ხარ ამხელა ნატოს კოორდინატორი?! გაანძრიე თავი… ყველამ გაანძრიეთ თავები, თუ არ გინდათ, რომ დაგენძრეთ!

3. რაღაც უფრო კრეატიული სიუჟეტები უნდა მოვიფიქროთ. არ ჭრის უკვე ეს „რუსის აგენტი“ მხოლოდ. ამ კაცის ფსიქიკას უნდა დავარტყათ. ხომ ხედავთ ოჯახზე ლოცულობს! ჰოდა, სწორედ იქ უნდა დავარტყათ, რაზეც ლოცულობს. რაიმე რუსის ქალების ისტორიები უნდა მოვიფიქროთ. ზაზა გოროზია და გივი თარგამაძე ჩავრთოთ… რაღაც იმ მასშტაბის უნდა იყოს, როგორც მაშინ ასათიანზე რომ იყო… შემზარავი… თენგო, თუ გინდა, რომ ის დიდი კრედიტი დაფარო, უნდა გაინძრე! ისეთი რამე უნდა მოიფიქრო, რომ ოჯახში შხამი ჩაასხა… უნდა მიხვდეს, სად შემოდგა ფეხი… მის შვილებზე იმუშავეთ… არავითარი დანდობა! მოიფიქრეთ რამე – ავადმყოფობა, ფსიქიური გადახრები, ვამპირიზმი! საზოგადოებრივ არხს არ აწყენდა, ცოტა აკადემიზმი გვერდზე გადადოს და რეალ-ტივის სტილში იმუშავოს! თუ არ გინდათ, რომ ის ჩანთხლეული მილიონები უკან ამოგანთხევინოთ! გია და ლევან, პარსონის წაღებულ ფულსაც თქვენ დაგაბრუნებინებთ, თუ ვერ ივარგეთ, თქვე დედამ… თუ გინდათ, სტაჟირებაზე გაგიშვებთ არველაძესთან, ხო ხედავთ კაცი რაებს იგონებს!..

4. უნდა გახვიდეთ საერთაშორისო დონეზე! მოიწვიეთ ყველა, ვიზეც ხელი მიგვიწვდება! მონაკოს პრინცს კალმახელიძე დაურეკავს! მე ანდრე გლუქსმანს ჩამოვიყვან… ეკას დაურეკე ვანო, ზღულაძეს! ნემის ყუნწში გაძვრეს და მამამთილიც ჩამოიყვანოს და კიდევ სხვებიც!.. სარკოზი რომ ჩაფლავდება არჩევნებზე, მერე მაგასაც ჩამოვიყვან ოჯახთან ერთად! “პიკი” უნდა ავამუშავოთ… კოტრიკაძეს გავკარი …! ინგლისურ არხად უნდა გადავაკეთოთ „პიკი“! რა დროს კავკასიაა, თავს უნდა მივხედოთ!.. რამე თქვენც მოიფიქრეთ, თქვე იდიოტებო…

==================================

ნერვული სიცილი…

–         სადაა წაიღეთ ჩემი ცხვირის წვეთები, თქვენი ახვარი დედა…!

ბელადი მოულოდნელად ტრიბუნიდან გარბის… დაცვა მისდევს… დარბაზში ჩოჩქოლია, ვიღაცას გული მისდის…

დაცვის უფროსი გარბის და მობილურში ჩაჰყვირის:  “ქალბატონო გიული, ჩქარა… ისევ გასქურა!.. მე-8 ვარიანტი გვაქვს!”…

ისევ ირთვება ჰიმნი:

„დარია თუ ავდარია…“


კომენტარი ია ანთაძის ბლოგზე ”შეხვედრა სამშობლოსთან” და თემურ ჭკუასელის გამოხმაურებაზე ”კვირის პალიტრაში”


ია,

თემურ ჭკუასელმა, როგორც კარგმა მეგობარმა, სწორედ ისე წაიკითხა ეს ბლოგი, როგორც მეგობრობით მიკერძოებული ადამიანი წაიკითხავდა. მის ადგილზე, ალბათ, მეც ასეთ წერილს დავწერდი. მე ვიცი, რომ თქვენ “სამშობლოსთან შეხვედრაში” სულ სხვას გულისხმობდით, და არა იმას, იყო თუ არა ნამყოფი ბიძინა ივანიშვილი ფშავში თუ სვანეთში და იცის თუ არა მან ქართული ადათ-წესები. ან რამდენად მოსალოდნელია, რომ ბიძინა ივანიშვილი ხალხში გაერევა და უბრალო ადამიანებთან საუბარს ჩვეულებრივი რიგითი ადამიანივით გააბამს. დიდად არ გამკვირვებია, რომ სწორედ ასე იქცევა.  

 

თქვენ გინდათ, ია (თუ მე სწორად გავიგე), რომ ბიძინა ივანიშვილი თავისი სახელით და გვარით მივიდეს ქართველებთან, გაეცნოს მათ და ჰკითხოს, რა უჭირთ და როგორ უჩანთ საქართველოს გადარჩენა.

თქვენ გინდათ, რომ იმ უამრავ კარგ მოქალაქეს, გულანთებულ პატრიოტს და სიმართლის მსახურ მოუსყიდველ ადამიანს (მაგალითად, ხარაგაულელ იზა ვეფხვაძეს ან ბათუმელ ეთერ თურაძეს), რომელთაც თქვენ – ია ანთაძე – საქართველოს სხვადასხვა კუთხეში ხშირი სტუმრობებიდან  და თქვენი საქმიანობიდან გამომდინარე, იცნობთ, მიეცეს ბიძინა ივანიშვილთან უშუალოდ შეხვედრის და საუბრის საშუალება. რითაც ბიძინა ივანიშვილი გაცილებით მეტად გაიცნობს საქართველოს ჭირ-ვარამს და ეცოდინება, ვინ არის ჩვენში ”მარილი მიწისა”, – ის ხალხი, რომელსაც უნდა ეყრდნობოდეს ნებისმიერი ნორმალური ხელისუფლება და რომლებიც არსებულმა არანორმალურმა ხელისუფლებამ ან ბატონი ტულივით (ნათელში ამყოფოს!) ჩარეცხა, ან  უნდა, ქალბატონი იზასავით მოიშოროს!  და ეს სურვილი არის აბსოლუტურად ლოგიკური და სამართლიანი!

 

არა მგონია, თავად ბიძინა ივანიშვილი არ იყოს ამის მსურველი! ნებისმიერი კარგი მენეჯერის ამოცანაა, არა ის, რომ წინასწარმეტყველივით მიხვდეს, რა უნდა აკეთოს, არამედ თავის ხალხთან მუდმივი შეხვედრებით განსაზღვროს, რაა პირველი რიგის ამოცანა, და რა – მოითმენს, სად იყო შეცდომები დაშვებული და როგორ ავიცილოთ ისინი მომავალში. და ამ საქმეში, რაც უფრო სწორად აარჩევს იგი ადამიანებს – არა პირადი ერთგულების, არამედ საქმის ერთგულების,  ნიჭისა და პროფესიონალიზმის ნიშნით, და რაც უფრო მეტად შეძლებს, რომ წლების განმავლობაში მხოლოდ ერთი და იგივე ”რჩეულთა” თვალებით არ უყუროს ზემოდან საქმეს და ქვეყანას, მით უფრო კარგი და სწორი იქნება მისი მენეჯერობა და მმართველობა.

 

ბიძინა ივანიშვილმა სწორად დაუწუნა ქვეყნის მართვა მიხეილ სააკაშვილს, რომელიც ყველაფერს იმის საწინააღმდეგოდ აკეთებს, რაც მენეჯმენტის სახელმძღვანელოებშია აღწერილი და სწორედ ისე აკეთებს, როგორც მედიჩების, ბორჯიების, მაკიაველის პოსტულატები ქადაგებს…

 

მაგრამ არის ერთი ”მაგრამ”!

 

ერთია, რა არის სწორი და მეორე, როგორ  და როდის იქნება სწორი.

 

ია, თქვენი სურვილი, რომ ბიძინა ივანიშვილი თავად მივიდეს ხალხის სახლებში, სანამ ისინი მივლენ მის ოფისებში, არის ცოტა შეუსაბამო იმ რეალობასთან, რაც სააკაშვილმა და მისმა მანქურთებმა საქართველოში შექმნეს. და პრაგმატული თვალსაზრისით, მე ვერ ვურჩევდი ბიძინა ივანიშვილს ამ ნაბიჯის ამჟამად გადადგმას.

 

კარგად უნდა ვხედავდეთ, რომ სააკაშვილი უზომოდ კომფორტული სიტუაციიდან, რომელშიც იყო ივანიშვილის გამოჩენამდე, მოხვდა უზომოდ დისკომფორტულ სიტუაციაში, როცა მისი ყოველი ქმედება თუ უმოქმედობა თანაბრად წამგებიანია მისთვის. რადგან ერთადერთი ველი, სადაც მან წესით და სამართლით უნდა მოახერხოს და მოუგოს ბიძინა ივანიშვილს, ეს არის ხალხის წინაშე პოლიტიკური დებატები, რაზეც აბსოლუტურად დისკრედიტირებული რეჟიმი და მისი პლასტელინივით მაგარი მიშა ვერაფრით ვერ წავლენ.

 

სამაგიეროდ, მათ კარგად ახსოვთ მათგან საჩვენებლად კვარცხლბეკიდან გადმოდგებული ბელადის შეგონება – ”არ არის ადამიანი, არ არის პრობლემა!” საჩვენებლად-მეთქი, ვამბობ, რადგან სააკაშვილის და მისი რაზმის სახით ნეობოლშევიზმს ერთგული გამგრძელებლები ჰყავს.

 

ამიტომ მე ძალიან მიჭირს დავეთანხმო ხალხში გასვლის არა იდეას, მაგრამ – ამ იდეის პრაქტიკული რეალიზაციის გეგმას – ამჟამად მაინც…

 

და იმაშიც ვეთანხმები ბატონ თემურ ჭკუასელს, რომ სააკაშვილის წალენჯიხიდან წამოსვლის გახსენება საკმაოდ ორაზროვან ასოციაციებს იწვევს. მგონი, ყველა ვთანხმდებით, რომ მიხეილ სააკაშვილის რევოლუციური გზა არ არის ის, რასაც უნდა ვესწრაფოდეთ.  თუმცა არ არის გამორიცხული, რომ ხელისუფლების სულელური პროვოკაციების შედეგად (თუ არჩევნებს ჩვეულებისამებრ გააყალბებენ) იგი მაინც ცუდ, მაგრამ უკვე ერთადერთ გამოსავლად იქცეს. მაგრამ დამეთანხმეთ, რომ მაშინ, თუ მაინც ისევ რევოლუცია გვიწერია, ბიძინა ივანიშვილის ქ-ნ იზა ვეფხვაძესთან და მისნაირ ათასობით ადამიანებთან პირადი შეხვედრები კი არ გადაწყვეტს საქართველოს მომავლის მიმართულებას გზაგასაყარზე, არამედ საქართველოს მილიონობით მოქალაქისაგან (ქვეყანაში, თუ ქვეყნის გარეთ) იმის გაცნობიერება, რომ ასე ცხოვრება აღარ შეიძლება! რომ ეს რეჟიმი არასდროს გადაშენდება და პირიქით, სულ უფრო წარმატებული იქნება ჩვენს გადაშენებაში, თუ ჩვენ არ გადავაშენეთ მუბარაქის და ბენ ალის რეჟიმებივით!

 

და ”მოქალაქეობის მოპოვების” თემაც ძალიან საფრთხილოა, რამეთუ აქაც კარგ მთქმელს ფანტასტიური გამგები სჭირდება. ბიძინა ივანიშვილი საქართველოს მოქალაქე იყო, არის და იქნება თავისი საქმით, საქართველოს და მისი მოქალაქეების მიმართ თავისი ერთგულებით და არა – სააკაშვილის მიერ გაცემული პასპორტით. და სანამ იმაზე ვიმსჯელებთ, როგორ უნდა ”მოიპოვოს”  მან საქართველოს მოქალაქეობა ჩვეულებრივ ადამიანებთან შეხებით და ადამიანური ხიდების გაბმით, მე პირადად იმ ”მოღვაწეებზე” ფიქრს გავუსწრებდი, ვინც მიუხედავად თავიანთი დანაშაულებრივი ქმედებებისა, დღეს არამცთუ საქართველოს თავისუფალი მოქალაქის სტატუსს ფლობენ, არამედ იმასაც ბედავენ, რომ ვინმეს, და მით უფრო ბიძინა ივანიშვილს, საქართველოს მოქალაქეობა ჩამოართვან!

 

საქართველოში უკანონობის წყვდიადი მეფობს!

 

ამას უნდა ვებრძოლოთ და ამისთვის უნდა გავერთიანდეთ. ძალიან ცუდი იქნება, თუ თქვენი სწორი მოქალაქეობრივი პოზიცია, ია, და ბატონ თემურის არანაკლებ სწორი მეგობრული პოზიცია გაბუტვებამდე მიგვიყვანს მაშინ, როცა რეჟიმის და მისი ერთგული აფთრების გადარჩენის ძირითადი შანსი მხოლოდ ამაშია: Divide et impera!

 

http://www.radiotavisupleba.ge/content/blog/24387106.html

http://www.kvirispalitra.ge/public/10140-gza-samshoblosaken.html

 


ღია წერილი ნაციონალური მოძრაობის მეორე ეშელონის ერზაც-პოლიტიკოსებს


ღია წერილი ნაციონალური მოძრაობის მეორე ეშელონის ერზაც-პოლიტიკოსებს:
ე. კვერნაძეს, მ. მაჭავარიანს, ხ. გოგორიშვილს, გ. წერეთელს, ფ.  თოდუას, კ. ხაბაზს, გ. ასანიძეს, შ. მალაშხიას, ა. ბობოხიძეს, რ.  კერვალიშვილს, გ.  გოგუაძეს, მ. სამადაშვილს, ნ. ჯანაშიას, ი. კენჭოშვილს, ლ. მინდელს,  კ. ოქრიაშვილს, გ. კაკალაშვილს, რ. ბჟალავას, კ. კვიციანს და სხვებს – უმცირესობის უმრავლესობას („ესენი ვინ არიან?-თ“)

=======================================

მართალი გითხრათ, არ მეგონა, თუ თქვენ წერილს მოგწერდით.
სად – თქვენ და სად – მე?

მაგრამ არის ერთი სერიოზული საფუძველი, თქვენ და მე  თანამოქალაქეები ვართ.

ანუ თქვენ, ისევე როგორც მე, საქართველოს მოქალაქეები ბრძანდებით.

გამოგიტყდებით, არაფერი მექნებოდა საწინააღმდეგო, თქვენ რომ არ იყოთ საქართველოს მოქალაქეები. და დარწმუნებული ვარ, თქვენც ზუსტად იგივეს ფიქრობთ  ჩემს და ჩემნაირების შესახებ.

ან მე კი რა მოსატანი ვარ, როდესაც თქვენ (უფრო სწორად  – თქვენმა სათაყვანებელმა და უნაკლო პრეზიდენტმა) აჰყარეთ მოქალაქეობა საქართველოს  იმ მოქალაქეს, რომელიც მთელი 15 წელია აფინანსებდა უამრავ გაჭირვებულსა და ყველაფერს  სანუკვარს, რომელთა და რის დაფინანსებაზე თქვენ არასოდეს გიფიქრიათ, რადგან მხოლოდ საკუთარი თავი გახსოვდათ! და იმაზეც არ გიფიქრიათ, რომ ეს ადამიანი თქვენც გაფინანსებდათ.

მაგრამ მე მინდა, რომ თქვენგან განსხვავებით, არ ვწყვეტდე  იმას, ვინ არის ამ ქვეყნის მოქალაქეობის ღირსი, და ვინ – არა.

თქვენ ჩვენი მთავრობის გაგრძელება ბრძანდებით. სერიოზული  კუდი თუ შლეიფი, როგორც გენებოთ…

თუმცა სერიოზული ფუნქცია თქვენ არ გაქვთ, მხოლოდ დეკორატიული  გამწვანების როლს ასრულებთ. როცა ქვეყნის რეალურ მმართველ ბანდას სჭირდება, თქვენ წინასწარ დაწერილ როლს გაძლევენ, რომელიც თქვენ გამოთქმით უნდა წაიკითხოთ, გრძნობა და ემოცია  უნდა ჩააქსოვოთ, მტერი უნდა დაგმოთ და მაფიოზურ ბანდას ერთგულება უნდა დაუდასტუროთ.
ამისთვის თქვენ გპატიობონ ვალებს, გაძლევენ კრედიტებს, გიმტკიცებენ მიწის ნაკვეთებს და გაგებინებენ ტენდერებს. თქვენი შვილები საზღვარგარეთ სწავლობენ და თქვენი ოჯახის
წევრები ტელევიზიების თუ სპა სალონების ხელმძღვანელობაში იმდენ ფულს იღებენ, რაც თქვენ  არასოდეს დაგესიზმრებოდათ.

და რა ფასს იხდით ამაში, არ დაფიქრებულხართ?

თქვენ ამაში იხდით სამშობლოს ღალატით!

თქვენ, საქართველოს მოქალაქეები, თქვენს უბადრუკ, მოჩვენებით და დროებით კეთილდღეობას ყიდულობთ  სამშობლოს  გაყიდვის ხარჯზე.  ყიდით ყველაფერს – მიწას, საზღვრებს, ხე-ტყეს, საზღვარგარეთ  საშოვარზე გადახვეწილი ადამიანების მომავალს, ლტოლვილების იმედს, ბავშვების ბედს…
მათ შორის საკუთარი შვილებისაც, რომელსაც არ ფიქრობთ, რომ თქვენი საქციელით სამშობლოს  ართმევთ.

ნამდვილად არ მიფიქრია, რომ ძალიან შორსმჭვრეტელები ბრძანდებით, მაგრამ არც ისეთ ახლომხედველები მგონიხართ, რომ ვერ ხედავდეთ – ასე გაგრძელება  შეუძლებელია!

თქვენ ხომ კარგად იცით, რომ ნებისმიერ ილუზიას აქვს  ბოლო, რომ ტყუილი რაც უფრო დიდია და დამაბრმავებელი, მით უფრო ხანმოკლეა. თქვენი ხელისუფლების  გემი უსაშველოდ იძირება და ამას ყველა დაინახავს, ბრმის გარდა.

თქვენ აღარ გაქვთ ქვეყნის სამართავი სახსრები –  ვალი კატასტროფულად იზრდება და არავითარი პერსპექტივა  არ ჩანს, რადგან  ექსპორტი იმპორტზე 5-ჯერ ნაკლებია, ინვესტიციები აღარ შემოდის, ბიზნესი  უკვე დასამარებულია, 2012 წლიდან კი საგარეო ვალების მომსახურების პროცენტის თანხა
ნახევარი მილიარდ დოლარზე  მეტი გვექნება გადასახდელი.
არავითარ ახალ სესხს ძველი ვალის გადახდების გარეშე არავინ გვაღირსებს და ილუზიაა ის,  რომ თქვენს მთავრობას ვინმე რაიმეს ასესხებს.

ერთადერთი გზა, რომ თქვენმა ხელისუფლებამ ფინანსები  იშოვოს, ქვეყნის  დარჩენილი ტერიტორიების გაყიდვაა.
თქვენ, რომელნიც მუდამ მოსამართი სათამაშოებივით ტიტინებთ სამშობლოს გაყიდვის საშინელ  ცოდვაზე, რატომ არ ფიქრობთ, რომ სწორედ თქვენი ხელმძღვანელობა ჰყიდის ქვეყანას, ხალხს და მის მომავალს? როგორც ფიქრობთ, ამ უმძიმესი დანაშაულისა და ცოდვისთვის, თუნდაც ამაზე ხელის დაფარებისათვის – თქვენ – კანონმდებლებს, არაფერი მოგეკითხებათ?

თქვენმა მთავრობამ მოახერხა, რომ 96%-იანი რეიტინგი 10%-მდე ჩამოეყვანა. თქვენ ნახევარი მილიონი დევნილის მხარდაჭერა დაკარგეთ, როდესაც  მათ არძინბაზე და კოკოითზე უარესად მოექეცით და  საცხოვრებელი ადგილებიდან ფაშისტური მეთოდებით მეთოდურად  ხელმეორედ გაყარეთ, რადგან არძინბა და კოკოითი არ იყვნენ მათი მთავრობა – ისინი რუსეთის მარიონეტები იყვნენ და თქვენ თქვენი ქმედების საკუთარი თავი მათთან ერთ დაფაზე დააყენეთ.
სააკაშვილი და სუბელიანი ლტოლვილების თანხებს ითვისებენ, მერაბიშვილი – ლტოლვილებისათვის  სახლების ასაშენებლად გამოყოფილ დახმარებას, დევნილებს ართმევენ  თავის სარჩენ უკანასკნელ საშუალებებს, უხურავენ ჯიხურებს, რესტორნებს, კაფეებს… როგორ გგონიათ, ეს შეგრჩებათ?

თქვენმა მთავრობამ მოსპო საქართველოში თავისუფალი ბიზნესის კეთების შანსი. ყველა, ვინც თავის სარჩენ ფულს შოულობს, იმის შიშის ქვეშაა, რომ მას  შეთითხნილი საბაბით ყველაფერს წაართმევენ და საპროცესო გარიგების საშუალებით მათხოვრად  აქცევენ. როგორ ფიქრობთ, ის ადამიანები, რომელთაც აწყობილი ბიზნესები დაუნგრიეს, ან  მომავალი შეპირებული ბიზნესის ილუზიებით მოხიბლულებს და ენთუზიზმით აღსავსეთ, უმძიმესი ვალების ტვირთი აჰკიდეს და სახლ-კარი გააყიდინეს, ეს ადამიანები გაპატიებენ მათი და  მათი შვილების დამონების დროებით წარმატებულ მცდელობას?

ხოლო ის გაჭირვებულები, რომლებიც ქუჩაში ვაჭრობით ახერხებდნენ ოჯახების რჩენას, თქვენმა ლიდერებმა კანონგარეშედ გამოაცხადეს და ქუჩებიდან გუდა-ნაბადი აუკრეს. მათ არ აძლევენ ვაჭრობის და არსებობის საშუალებას, სასტიკად ერეკებიან, ართმევენ უკანასაკნელ გროშებს და საქონელს… როგორ ფიქრობთ, ეს ადამიანები, რომელთაც თქვენ ყოველგვარ სიკეთეებს და დახმარებას პირდებოდით, რომელთა ხმებით მოხვედით და რომლებიც ასე სასტიკად გადააგდეთ და შიმშილისათვის გაწირეთ – თქვენ ხმას მოგცემენ, მხარს დაგიჭერენ, გენდობიან? თუმცა თქვენმა ლიდერებმა ეს კარგად იციან და დევნილების შემდეგ ახლა ქალაქებიდან უმუშევრების გადასახლებასაც ფიქრობენ.., თქვენ კი იმაზე დაფიქრდით, რა გრძნობები გექნებოდათ იმ ადამიანების მიმართ, ვინც თქვენ ყველანაირად გაგწირავდათ და საცხოვრებელი ადგილიდან გაგასახლებდათ…

თქვენმა ლიდერებმა მოახერხეს და ქვეყანა, რომელიც სურსათით თავსაც ირჩენდა და საზღვარგარეთაც გაჰქონდა, უცხოური გენმოდიფიცირებული და შხამიანი პროდუქციის მათხოვრად აქციეს. თქვენმა ლიდერებმა 4-5-ჯერ და მეტად შეამცირეს საქართველოში სათესი ფართობებიც, მოსავალიც და საქონლის და ფრინველის სულადობაც. თქვენ ვერ ხვდებით,  რომ მშიერი არსებობისაკენ მიგყავთ მთელი მოსახლეობა და რა მოხდება მაშინ, როდესაც მხოლოდ თქვენ დაგრჩებათ ნორმალური საკვების შეძენის საშუალება, ხოლო დანარჩენებს შვილებისთვის  პურის საყიდი ფულიც აღარ ექნებათ?

თქვენი ლიდერები მიზანმიმართულად აღარიბებენ და წამლავენ ხალხს. ქვეყანაში, საიდანაც ხან უკრაინაში და ხან თურქეთში საიდუმლოდ გატანილ ასობით კილოგრამი ჰეროინის პარტიებს ნახულობენ ხოლმე, მხოლოდ ნარკოტიკების მომხარებლებს იჭერენ და არა ნარკობარონებს, რადგან მთავარი ნარკობარონები ძალოვანი სტრუქტურების ხელმძღვანელები არიან. სწორედ ამით აიხსნება, რატომ ვერასდროს „ვერ ნახულობს“ ჩვენი „რეფორმირებული და არაკორუმპირებული პოლიცია“ და საბაჟო ამ ასობით კილოგრამიან ნარკოპარტიებს.

თქვენმა ხელისუფლებამ ააღორძინა სასწავლო დაწესებულებებში პოლიტიკური პროპაგანდა  და სკოლა სატუსაღოებად  და ადამიანების დათრგუნვის ინსტიტუტად აქცია, ხოლო სტუდენტური თვითმმართველობის შარიკოვული ორგანოების სახით ბოლშევიკური ტერორის  წლები  და კომკავშირის ყველაზე აგრესიული ფორმა დააბრუნა.

თქვენი ლიდერების წყალობით დღეს საქართველოში ავადმყოფობა ოჯახის დანგრევად იქცევა, იმდენად არახელმისაწვდომი გახდა ჯანდაცვა.  თქვენ შემოიღეთ ფარმაცევტული კომპანიების მონოპოლია წამლებზე, საავადმყოფოებზე, აფთიაქებზე, დაზღვევაზე – ის რაც არსად არ არის მსოფლიოში და რაც მერე თქვენს სარჩევნო ხაზინაში დახმარება-ვერმიღებული ადამიანების სისხლში გასვრილი ფულით ბრუნდება.

თქვენმა ხელისუფლებამ ციხეები სასტიკ საწამებლებად აქცია.
საკონცენტრაციო ბანაკების წესების და პენიტენციარულ სისტემაში სადისტების გამეფებით ნაცისტური გერმანიის სადამსჯელო სისტემა აღადგინეთ, რომელიც შეღებილი ფასადებით და სამვარსკვლავიანი 60-დოლარიანი სასტუმროების „შტუკატურკით“ გინდათ დემოკრატიად გაასაღოთ!
ეს არის თქვენი ნაქები „დემოკრატია“, სადაც ასობით ნაწამები და გარდაცვლილი პატიმრის საქმე გამოუძიებელი რჩება, ხოლო ბაჩო ახალაიები, მეგის ქარდავები და „მაიმუნები“ თქვენი რეჟიმის „საპატიო სახეებად“ იქცნენ.

თქვენმა მთავრობამ მოსპო ადვოკატის უფლებები, სასამართლო თავისი სიბინძურეების მოსაწმენდ ჩვრად აქცია და პროკურატურა ვიშინსკის დროინდელ „სიმაღლეზე“ აიყვანა და გააბატონა. წამებით და დაშინებით ამოგლეჯილი „აღიარებითი ჩვენებები“ ისევ იქცა “ჩვენებათა დედოფლად”, როგორც სტალინის გულაგის სისტემაში. Soft-GULAG – აი, თქვენი მოწონებული რეჟიმის ჩემეული განსაზღვრება და მოვა დრო, როცა თქვენც მოგიწევთ, ამ განსაზღვრებას დაეთანხმოთ.

თქვენმა მთავრობამ ჯარს პატივი აჰყარა და პოლიცია გესტაპოდ აქცია. საყოველთაო მოსმენების ბერიასეული მეთოდების და სამსახურის დაკარგვის და შვილების  დაჭერის შიშის დანერგვით არსებობს თქვენი პარტოკრატიული ოლიგარქია, რომელიც ზონდერების და ადამიანებისათვის ნარკოტიკების ჩამდები პოლიციელების იმედად არის დარჩენილი… არავითარი ეკონომიკური გეგმა, არავითარი პოლიტიკური გეგმა… პრემიერ-მინისტრი, რომელიც ფეისბუქში 300 კაცს აბოლებს, რა კარგია 4 მილიარდიანი საგარეო ვალი, და რომ შეიძლება 75,000 კაცი, „ან ცოტა მეტიც კი“ დაასაქმოს – იქ, სადაც უმუშევრობა 50%-ზე მეტია… ილუზიები, რომ ნატოს კარი ღიაა და რომ ევროპა და ამერიკა, რომელთაც კრიზისის აჩრდილი თავად ემუქრებათ,  საქართველოს გადასარჩენად ისევ ისვრიან 3-4 მილიარდს…

ნეტარ არიან მორწმუნენიო, ამბობენ… მაგრამ –  დებილი არამზადებიო, არავის უთქვამს!

წერილი იმიტომ არ მოგწერეთ, რომ თქვენი ფანი ვარ. უბრალოდ, თქვენზე მეტ პასუხისმგებლობას ვგრძნობ იმ ქვეყნის მიმართ, რომელიც თქვენზე ნაკლებ ნამდვილად არ მიყვარს და თქვენზე მეტად მინდა, რომ გადარჩეს.

ნუთუ ვერ ხვდებით, რომ ახლა ახლოს ხართ იმ რუბიკონთან, რომლის გადალახვის შემდეგ უკან დაბრუნებას და აქ მომავალში მშვიდად ცხოვრებას უკვე  ვეღარ შეძლებთ?

საქართველოს მთავრობამ უკვე სამჯერ მოუწყო 9 აპრილი საკუთარ ხალხს – 7 ნოემბერს, 6 მაისს და 26 მაისს… და თქვენ კიდევ პარტიულ ბილეთებს ებღაუჭებით!

საქართველოს მთავრობამ 100-მდე ადამიანის – საკუთარი  მოქალაქეების – სისხლში გაისვარა ხელი, პრეზიდენტი ამით ამაყობს და თქვენ სხვათა ჰომოფობიაზე ბედავთ ხმის ამოღებას!

საქართველოს მთავრობამ დაკარგა და ყოველდღიურად კარგავს ტერიტორიებს. საქართველო შაგრენის ტყავივით პატარავდება და მთავრობა ჩუმად არის და, პირიქით, ყველას აჩუმებს, რადგან სწორედ ამით – ქვეყნის ინტერესების ღალატით, ტერიტორიების გაჩუქებით და  სიდამპლით უნდა იშოვოს გესტაპოს გამოსაკვები სალაფავი და  თავისი პოლიტიკური არსებობის მანდატი.

თქვენ რა გინდათ?

როგორ გინდათ, რომ გააგრძელოთ ცხოვრება?

ხალხი მხოლოდ ერთ რამეს გთხოვთ – რომ მოგვცეთ თავისუფალი არჩევნების უფლება!!!

თქვენ რომ ჭკუა გქონდეთ – ამდენი წლების ძარცვა-ყლეფვის შემდეგ, როცა ხაზინა ცარიელია და ყოველ ქართველს ათასობით დოლარის ვალი აჰკიდეთ, ეს  თქვენთვისაც კარგი გამოსავალი უნდა ყოფილიყო. რომ გადაგებარებინათ გაპარტახებული, ხალხისგან და ფინანსებისგან დაცლილი ქვეყანა ნორმალური არჩევნების გზით სხვა მთავრობისათვის და ამით მაინც გამოგესყიდათ თქვენი ლიდერების დანაშაულებრივ ქმედებებში ხელშეწყობა. თქვენ რომ ელემენტარულ ლოგიკას და მორალს ექვემდებარებოდეთ, ან უკვე აქედან გაქცეული უნდა იყოთ, ან ნამუსი უნდა გყოფნოდათ და ხელისუფლების ლეღვის ფოთლის როლის თამაში უნდა შეგეწყვიტათ.
მაგრამ, ეტყობა, არც ღმერთის გჯერათ და არც -დიალექტიკის.

ძაან დიდი ასოებით კი ამოტვიფრა თქვენმა მაგარ-ლიდერმა თავის სისხლზე აშენებულ სასახლეზე რუსთაველის სიტყვები, მაგრამ ეს სიტყვები დარჩება ჭეშმარიტებად მაშინ, როცა იმ სასახლეში მისი ჭაჭანება აღარ იქნება, ყველა ბნელ საქმეს ფარდა აეხდება და ყველა დაინახავს, ვინ იყო ბოროტი და მამონას მსახური! ნიურნბერგის არა, მაგრამ დიღმის პროცესი არ აცდებათ რეჟიმის მაფიოზურ ლიდერებს.

თუ თქვენ არ მოგვცემთ თავისუფალი არჩევნების უფლებას, ამით მთელ მსოფლიოს თქვენს უზურპატორობას დაუმტკიცებთ!

უზურპატორები კი დღესაც ისე ამთავრებენ, როგორც კალიგულას და  ნერონის დროს… ჩართეთ ტელევიზორი და ნახეთ, როგორ ამთავრებენ უზურპატორები და მერე მათ როგორ ამთავრებენ. და ნუ გექნებათ იმის ილუზია, რომ ქართველი ხალხი ამაზე არ და ვერ წავა. არავინ იცოდა, თქვენი ლიდერები რაზე იყვნენ წამსვლელნი და ნურავინ დაიწყებს იმის განჭვრეტას ხალხი რისი შემძლებელია… მუბარაქზე დიდი არმია და პოლიცია ნამდვილად არ ჰყავს ეგრეთწოდებულ მაგრადწოდებულს.

მე არ მაქვს იმედი, რომ თქვენი ლიდერები ჭკუაზე მოვლენ და მუბარაქის, კადაფის და ასადის გზას არ აარჩევენ.

მე დიდად იმის იმედიც არ მაქვს, რომ თქვენ გეყოფათ გონიერება და მოქალაქეობრივი შეგნება და თვალები ახლა მაინც აგეხილებათ.

მე უფრო იმის „იმედი“ მაქვს, რომ თქვენი თანდაყოლილი ინტუიცია, რომელიც ყოველთვის სწორად გკარნახობდათ, რომ ნავი იძირებოდა, ახლაც სწორად  გიკარნახებთ იმას, რომ ჩაძირვისთვის განწირული ნავიდან გადახტომის დროა.

ნუ ჩაჰყვებით მიხეილ სააკაშვილს პოლიტიკურ საფლავში.

ხელი შეუწყვეთ სამშობლოს, გადარჩეს სისხლისღვრას და ქაოსს
და შეიძინეთ მომავალ საქართველოში ცხოვრების უფლება, რომელიც არამზადათა ბანდასთან ამდენი ხნის ქვემძრომობით და ხალხის გაუბედურებაში თანამონაწილეობით კითხვის ქვეშ დააყენეთ.

არაა აუცილებელი, ღიად გამოხატოთ თქვენი პოზიცია!

ძალიან კარგი იქნება, თუ ამაზე წახვალთ, მაგრამ ასეთ ნაბიჯს მე არ და ვერ მოგთხოვთ, საკუთარი მდგომარეობიდან გამომდინარე.

თქვენთვის მოიფიქრეთ გამოსავალი, სანამ გვიან არ არის, – ყველაზე მარტივი კი ის იქნება, რომ სხვადასხვა საერთაშორისო ორგანიზაციებს, მედიას  და დიპლომატებს, თუნდაც ანონიმურობის დაცვით მიაწოდოთ ინფორმაცია იმაზე, აქ რა ხდება.

ვისთვის რეკს ზარი?

ზარი ბევრი ადამიანისთვის რეკს დღეს საქართველოში და ეს ზარის რეკვა სულ სხვადასხვა რამეს შეიძლებოდა ეუბნებოდეს სხვადასხვა ადამიანებს. ვფიქრობ, რომ თქვენი ზარი გამაფრთხილებლად რეკს და აჯობებს, ყური მიუგდოთ!

არც თქვენი და არც ჩვენი შვილები არ იმსახურებენ უსამშობლოდ არსებობას. ამაზე იფიქრეთ.

საბოლოოდ ნუ გაღორდებით და ნუ დაბრმავდებით.

და სანამ სხვას აჰყრიდეთ საქართველოს მოქალაქეობას, იმაზე დაფიქრდით, თქვენ თავად რისთვის და რის ფასად გაქვთ ეს – “საქართველოს მოქალაქეობა”!

და არასოდეს არ გაუკეთოთ სხვას ის, რაც არ გინდა, რომ შენ გაგიკეთონ!


გამომზეურება


ედუარდ შევარდნაძის სიტყვები: ”საქართველოსთვის მზე ჩრდილოეთიდან ამოდის!”, რომელიც მან ლეონიდ ილიას ძე ბრეჟნევს უძღვნა, ყველას გვახსოვს.

 

შევარდნაძეს დაუფასდა და პოლიტბიუროს წევრობას გამოჰკრა ხელი ჩრდილოურ მზისქვეშეთში. მაგრამ  მერე,როცა მის შეძახილს – ”ნასტუპაეტ დიქტატურა!” – ყური არ უგდეს, სამშობლოს დაუბრუნდა იმისთვის, რომ ახალი ასტრონომიული ცვლილებები მოეხდინა პოლიტიკაში და ნელ-ნელა მზის ამოსვლის პუნქტი ჩრდილოეთიდან ჩრდილო-დასავლეთით – კოლუმბიის ფედერალურ ოლქში  გადაეტანა. 

და მაინც, გულმა უგრძნო, რომ იმ ერთხელ მიქარულისთვის მეორე არ უნდა დაემატებინა და ისე ჩაი-მწყურვალი წავიდა, ”საქართველოსთვის მზე ვაშინგტონიდან ამოდისო”, ხმამაღლა მაინც, არ უთქვამს…

 

მერე მოვიდნენ ახალგაზრდა რეფორმატორები… და ისეთი რიხით დაიწყეს ერთ ცალკე აღებულ ქვეყანაში სამოთხის შენება (თავისთვის, რასაკვირველია!), რომ მზის ამოსვლის ცენტრიდან გადმოხედეს და… დემოკრატიის მთავარი შუქურის სიგელი უბოძეს…

 

გაანათა, მარა, რა გაანათა ამ ქვეყანაში!!!

 

ხომ ყველაზე ძვირი ელექტროდენის ქვეყანა იყო, – მაინც – ყველაზე განათებულ და სინათლის ქალაქად იქცა…

[ან, პირიქით, რადგან ყველაზე განათებულად იქცა, ამიტომაც შუქურვარსკვლავებმა დენის ტარიფი დენით ტერორად აქციეს. დენის ეკონომიას ხომ ის აკეთებს, ვინც იხდის. ხოლო, ვისაც უხდიან და ამდიდრებენ, იმას რა ენაღვლება?! ”მასპინძელს უხარია და შენ ვინ გკითხავსო?”, კოსტაია ჟორჟოლიანი რომ იძახოდა ”დაკარგულ სამოთხეში”, ისეა ზუსტად! რაც უფრო განათებულია თბილისი, მით უფრო ღატაკდება ხალხი და მით უფრო მდიდრდებიან ”რაო ეეს- თელასთან” წილში ჩამჯდარი ვითომდა ”ამერიკათუმეები”]

 

ადუღდა ცხოვრება, ავშენდით… სინათლეს ვხედავდით იქაც და უფრო მეტად სწორედ იქაც – სადაც სიბნელე იყო! იმედი გვქონდა, რომ ზეგ საღამოს სოჭს და საინგილოს  დავიბრუნებდით და ხვალ დილით – სოხუმს და როკის გვირაბს… ამას თავისთავად მოჰყვებოდა ლანგრები ზედ დაწყობილი ოშკით, ხახულით, ტრაბზონით და ნოვორასიისკით…

 

მაგრამ მერე რაღაც მოხდა…

რაღაც გაიბზარა გალაქტიკაში და მზემ ისეთი უცნაური მოძრაობები განახორციელა, ჯორდანო ბრუნო რომ გაცოცხლებულიყო, გაოცებული და შერცხვენილი თავად ისკუპებდა ჭიაკოკონაში.

 

ჯერ იყო და შუქურა დაიბზარა და იმერეთში რომ იტყვიან – ”ლამფოჩკამ პარპალი დეიწყო”… მგელზე ნადირობა აიკრძალა საქართველოში – გიგი თევზაძის თხოვნით და, სამაგიეროდ, კაცზე ულიცენზიო ნადირობის უვადო სეზონი გაიხსნა…

 

მერე იყო და დღისით მზისით ისეთი გაყალბება და უნამუსობა დაიწყო, ადრე ღამით თუ იკადრებდა ვინმე უჯიშო…

 

დაბოლოს, ყველაფერი იმით დაგვირგვინდა, რომ საოცრად მოვიგეთ ომი!

ისე მწარედ მოვიგეთ, რომ მსოფლიოს მთელი პრეზიდენტობა შუქურას უთევდა ღამეს! ბიძინა კვერნაძის საოცრად ზუსტი მეტაფორა – ”ამაღამ ვინ გვითევს?” იყო ქართველების  ამ ”ძლევაი სატირალის” ზუსტი ალეგორია.

ჩვენ კი ვიდექით და გვიხაროდა, რომ სხვებისგან განსხვავებით, მოგებას ვხედავდით იქ, სადაც საჩვენო ნაცრისფერი კატაც კი არ ჭაჭანებდა…

 

ჰოდა, სწორედ ამის შემდეგ დაფიქსირდა მზის ანომალიები…

 

ჯერ იყო და მზე სამხრეთიდან – აზერბაიჯანიდან ამოვიდა. ხოლო მერე, საერთოდ, ეტყობა, Frequent Flyer-ზე მილები დააგროვა ბლომად და და ერთ კვირას რომ სტამბოლიდან ამოდიოდა,მეორე კვირას – თეირანიდან…

 

ჩრდილოეთის და დასავლეთის მზეობების მერე ძლივს მიეჩვია ქართველი ხალხი ასეთ სამხრეთულ განთიადებს და მარტო ის გვაწუხებდა, ნეტა ნატო რავაა უჩვენოდო და…

 

უცებ, ადგა მზე და ისევ აღმოსავლეთით გადასახლდა…

 

ოღონდ ”ვისოლის” გაძვირებული ავიაბენზინი იაპონიამდე არ ეყო, ეტყობა, და – სინგაპურიდან დაიწყო ამოსვლა…

ამას მოჰყვა საქართველოს პოლიტიკაში დიდ თურქობაზე უფრო ძლევამოსილი ”დიდი სინგაპურობა!”

– სად არის ყველაზე კარგი ცხოვრება? – სინგაპურში! ყველაზე თავისუფალი ბიზნესი? – სინგაპურში! ყველაზე მაგარი სოფლის მეურნეობა? – სინგაპურში! ყველაზე მდგრადი პარტია? – სინგაპურში! ყველაზე დიდი კუანი? – სინგაპურში! სად გრძნობს შუქურა თავს ყველაზე კარგად? – ნუ, რა თქმა უნდა, ისევ და ისევ სინგაპურში!!!

 

ჯერ მონელებული არ გვქონდა ის ფაქტი, რომ ევროპელები საქართველოდან იყვნენ თურმე წასულები და აღმოჩნდა, რომ ჩვენ თავად სინგაპურში ვიყავით წასასვლელები… ან, ჩვენ თუ არ წავალთ სინგაპურში, სინგაპური, როგორც ბედნიერების ნავსაყუდელი, თავად მოვა ჩვენთან – და დარჩება, როგორც სამუდამო გამიშება/გაკუანებით მზიური გაბრწყინების ნაცური ოცნების რეალიზაცია.

 

მაგრამ მზიური ანომალიები ამით არ დამთავრებულა. მეტიც! ყოველ სისხამ დილით, როდესაც ამინდი.გე-ს მიაწყდებით, აწი ის კი არ უნდა გაინტერესებდეთ, რამდენი გრადუსი იქნება დღეს, როგორც ის, – მზე საიდან ამოდის!

ეს ვექტორი ყოველდღე იცვლება! გუშინ რომ ირანიდან ამოდიოდა, დღეს ერდოღანმა გამოგვიგზავნა, ხვალ ალბათ ისევ სინგაპურული მზე დააცხუნებს, ხოლო ზეგ სულაც ჩილე ან პერუ იქნება პროგრამაში. ყველაზე საინტერესო ის ვარიანტებია, როცა ორი მზე ერთდროულად ამოდის – ევროკავშირული და სინგაპურული! ან – ამერიკული და ირანული!!! ხომ მაგარია?! გაორებული ობამურ-აჰმადინეჯადური მზე! ასევე გასაოცარია სომხურ-აზერბაიჯანული მზის მცხუნვარება – ვინ ვის აჯობებს საქართველოს გაცისკროვნებაში! უფრო სწორად, საქართველოს სწორუპოვარ ხელისუფლებას ვისი სული(ფული!) უფრო სურს და რამდენად ჩქარა იცვლება აზერბაიჯანული მზე სომხურით!

სულ იმის მოლოდინი მაქვს, როდის ამოვა საქართველოს ცაზე ყველაზე უფრო რეალური (საქართველოს მთავრობისთვის) ბელორუსიული მზე და მერე რამდენი ხანი დაჭირდება იმის გარკვევას, რომ ეს მზე სინამდვილეში რუსულია! ანუ, როდის დაამთავრებს მიხეილ სააკაშვილი 8 წლის წინ დაწყებული ჯადოსნური ჩაის სმას და მიხვდება, რომ წრე შეიკრა და მისი მზე ისევ იქედან ამოდის, საიდანაც მისი მოდელი ამოვიდა (ბიძამისის ხელით მორთმეული, ”მეჟდუ პროჩიმ”!)!

 

რაც მთავარია, არავის ეჭვი არ ეპარება, რომ ეს მზეთამზეობა საქართველოს ბედნიერების გარანტიაა!

 

დაიღალა ხალხი, ბატონებო! დაიღალა!

 

როგორ უნდა დაჯდეთ ისე, რომ ცალი საჯდომი ბრიუსელში გედოთ და ცალი – ინდოეთის ოკეანეში სველდებოდეს?  სად კუანობა და სად რობერტ შუმანობა? თუ ეს შუმანობა კი არა, მარტივი შამანობაა?

 

აგერ ახლა, სარკოზი ჩამოდის!

 

გასაგებია, რომ სარკოზი ისტორიული ფიგურაა და ის რომ არა, შეიძლება ჩვენი მზე ისეთი დაჩრდილული ყოფილიყო, რომ თვალი აგვერიდებინა – რა იცი, რა ოხრობა იქნებოდა ხეზე დაკიდებული…

ამიტომ სარკოზი საფრანგეთშია სარკოზი, თორემ ჩვენთვის სწორედაც რომ სარკო-მზეა!

 

ამიტომაც სამზადისი განსაკუთრებულია: თბილისში ხარაჩოები აღმართეს, თბილისის საკრებულო თავიდან გადალესეს და გადაღებეს. წმინდა გიორგი მოაპარკეტეს (ლაქს იმედია, არ წაუსვებენ), სცენა დადგეს, როგორც მითხრეს სცენასთან ახლოს ლუქს-ბიოტუალეტიც იქნება. მთელი ეს ტრიბუნა ისეთი სპეცორგმინით გადაიხურება, რომ ნებისმიერი არუთინოვის ნატყორცნ ლიმონკას კი არა, შვარცნეგერის ბაზუკას გაუძლებს. ალბათ, სარკოზის წინ ინდივიდუალური მინიტელევიზორი დამონტაჟდება, საიდანაც სარკო-მზე სამშობიაროდ გამზადებულ კარლა ბრუნის მიესიყვარულება და კარლაც უკეთ იმშობიარებს, თავისი რაინდის საყოველთაო დიდების შემყურე! მე მაგალითად, იმის მომხრეც ვარ, რომ მშობიარობა დიდ ეკრანზე ვაჩვენოთ, რათა ეს დიდი ეკრანი მთელი მსოფლიოს სააგენტოებმა პირდაპირ ეთერში აჩვენონ! ხუმრობაა? თბილისში თავისუფლების მოედანზე თავისუფლების სულის და ქანდაკების სამშობლოს პირველი პრინცი იბადება! ესეც ახალი მზის ამოსვლა იქნება ჩვენი შუქურისტანისთვის და მიშა და სანდრა მონათლავენ ბავშვს! სახელად ალბათ ნიკოლოზს დაარქმევენ! ხოლო გოგო თუ იქნება – ვერას!

 

ყველაზე საინტერესო კი ისაა, რომ ამ სარკოზობის დღე-სასწაულს ჩვენმა ხელისუფლებამ და მისმა  ტანადმა თბილისობის დღესასწაულის გადმოტანა ”დაამთხვია”! თბილისობა ყოველთვის ოქტომბრის ბოლო კვირას იყო, მაგრამ ახლა გაახსენდათ ჩვენს ასტრონომ-მეტროლოგებს, რომ ოქტომბრის 7-ში ტემპერატურა უკეთესია და გადმოიტანეს! ეტყობა, კოკომ დაიკაკანა ჟენევიდან – მეტროლოგიის ფარშევანგმა!

თუმცა უფრო მარტივი ახსნა ისაა, რომ, ბუშობისგან განსხვავებით, სარკოზობას ნაკლებად მიეტანებოდა ხალხი! და ვაითუ სარკო-მზეობას აუდიტორია დაკლებოდა! ახლა კი, თბილისობა დილით მწვადის სუნით და ჩურჩხელებით გამოიტყუებენ სახლებიდან დედაბუდიანად და… ჰოპ!.. ისე გადაკეტავენ ქუჩებს, როგორც მორეკილ ნადირს მარეკები და სხვა რა გზა ექნება 20-ლარიან ხორცს მონატრებულ და წმინდა გიორგის სცენასთან მირეკილ ქართველობას, თუ არა ტაში უკრას იმას, ვინც ჩვენი მთავრობა ჩამოშლას გადაარჩინა და ჩვენი ”მადლი” საუკუნოდ (თფუი, ეშმაკს!) მოისხა!

 

ჰაი, დედასა!..

ოღონდ პაწა პეწი დაგვიბრუნოს და ორიოდ წუთით მსოფლიო ეკრანებზე გაგვაელვოს და, თბილისობას კი არა, შობა-ახალ წელს არ გადმოიტანდნენ 7 ოქტომბერს, როო!!

 =========== 

ბრეჟნევი რომ ჩამოვიდა  და ედუარდმა ლიფტიანი ტუალეტი გაუხერხა ტრიბუნის ქვეშ, მაშინ ვინმე იფიქრებდა, რომ ამ მსოფლიო რეკორდს ასე მალე მოხსნიდნენ?

 

წინ მიდის ცხოვრება!

 Here come the Suns!